“Дьокуускай куорат” куораттааҕы уокурук баһылыгын дуоһунаһыгар “Биир ньыгыл Арассыыйа” баартыйа ыытар барыллаан куоластааһыныгар кыттар хандьыдааттар кэккэлэрэ хаҥаата. Муус устар 24 күнүгэр Промышленнай уокурук быраабатын кылаабынай исписэлииһэ Григорий ЗОРИН праймеризка кыттарын туһунан сайабылыанньатын тэрийэр кэмитиэккэ киллэрдэ.
Роман ПОПОВ, “Саха сирэ” хаһыат, edersaas.ru
Онон, муус устар 24 күнүнээҕи туругунан, Дьокуускай куорат баһылыгын дуоһунаһыгар барыллаан куоластааһыҥҥа билиҥҥитэ биэс хандьыдаат –- киин куорат баһылыга Айсен НИКОЛАЕВ, урбаанньыт Николай ПОТАПОВ, теле-биэриилэри ыытааччы Андрей И (ХОРОШЕВ), эдэр гвардеец Святослав СОФРОНЕЕВ, урбаанньыт Ирина ВЫСОКИХ — кыттара быһаарыллан турар.
Татьяна ТЫМЫРОВА уонна Григорий ЗОРИН сайабылыанньалара бу күннэргэ тэрийэр кэмитиэккэ көрүллүөхтэрэ.
Ыам ыйын 28 күнүгэр буолар барыллаан куоластааһыҥҥа кыттыан баҕалаахтартан сайабылыанньалары муус устар 27-тин киллэрэн туран, үлэ күнүгэр маннык аадарыска ылаллар: Дьокуускай, Аммосов уулуссатын 18 №-рэ. Сиһилии 421-421 төлөпүөнүнэн ыйыталаһан билсиэххитин сөп.
Манна эбэн эттэххэ, барыллаан куоластааһыҥҥа урут сууттана сылдьыбатах, баартыйа чилиэнэ биитэр баартыйата суох ким баҕалаах кыттара көҥүл. Праймериз кыайыылааҕа аны күһүн буолар быыбарга “Биир ньыгыл Арассыыйа” баартыйа аатыттан кыттар бырааптаныаҕа.
Роман ПОПОВ, “Саха сирэ” хаһыат, edersaas.ru