«Барыларын утарбыт» өлүөхүмэлэр саҥа хандьыдааттары туруордулар

Бу күһүн ыытыллыбыт быыбарга Өлүөхүмэ оройуонун Өлүөхүмэ куоратыгар уонна Сунтаар улууһун Сиэйэ нэһилиэгэр олохтоохтор баһылыкка турбут хандьыдааттары барыларын утарбыттара.

edersaas.ru

Онон хаттаан быыбар ыытыллыахтаах. Сэтинньи 7 күнүгэр «Өлүөхүмэ куората» МТ баһылыгын талыыга хандьыдааттартан  докумуону ылыы түмүктэннэ. Уопсайа, биэс киһи регистрацияланна. Ол иһигэр:

•  МАСИНА АЛЬБИНА МИХАЙЛОВНА, «Солянка нэһилиэгэ» МТ баһылыга;

• САФОНОВ ВАСИЛИЙ ВИКТОРОВИЧ, Өлүөхүмэ куоратын баһылыга, «Биир ньыгыл Арассыыйа» баартыйа туруорбут;

• АНТОНОВА НАТАЛЬЯ МАРКОВНА, Өлүөхүмэ улууһун дьаһалтатын отделын салайааччыта, административнай хамыыһыйа бэрэссэдээтэлэ;

• ЩЕБЛЯКОВ СЕРГЕЙ ЕВГЕНЬЕВИЧ, урбаанньыт, Дьокуускай куоракка олорор, ЛДПР баартыйа туруорбут;

• КОЛМЫГИНА АЛЕНА НИКОЛАЕВНА, үлэтэ суох, Өлүөхүмэ олохтооҕо.

Балаҕан ыйыгар ыытыллыбыт быыбарга эмиэ биэс хандьыдаат туруоруллан,  Наталья Антонова (18,76 %), Ларина Гуринова (13,20 %), Юрий Клюцев (11,53 %),  Анатолий Шаповалов (5,82 %), Виталий Новоселов (3,56 %)  киирсибиттэрэ. Ол эрээри 1154 киһи (ити быыбардааччылар 42,79 % ылар) барыларын утарбыттара.

Куорат баһылыгын талыы быыбара ахсынньы 3 күнүгэр ыытыллыахтаах.

edersaas.ru