«Барыбыт кыайыыта, барыбыт ситиһиитэ!»

Ааптар: Эдэр Саас

Бөлөххө киир:

Ил Дархан Айсен Николаев Дьокуускай «Тотальнай дьыктаан-2021» киинэ буолбутунан истиҥник эҕэрдэлээтэ.

«Бу барыбыт кыайыыта, ситиһиитэ!» — диэтэ кини. Дьокуускай саамай элбэх куолаһы ылан, Рязань, Ярославль, Салехард, Саранскай, Томскай куораттар иннилэригэр таҕыста. Ил Дархан муус устар 10 күнүгэр Саха сирин столицатыгар — Дьокуускайга «Тотальнай дьыктаан-2021» тиэкиһин ааптара Дмитрий Глуховскай кэлэрин, киин былаһааккаттан дьыктааны ааҕарын иһитиннэрдэ.

«Тотальнай дьыктаан» онлайн-марафонун бүтүн аан дойдуга көрдөрүөхтэрэ! Саамай ааҕар дойду саамай ааҕар эрэгийиэнин киинэ «Тотальнай дьыктаан-2021″ көрсөргө уонна тэрийэргэ бэлэм«, — диэтэ кини.

Куоластааһын икки түһүмэҕинэн ыытыллыбыта. Норуот куоластааһыныгар Дьокуускай туох да мөккүөрэ суох кыайыылааҕынан тахсыбыт. Иккис түһүмэххэ «Тотальнай дьыктаан» киининэн буолуохтаах куораты дьүүллүүр сүбэ чилиэннэрэ талбыттара. Дьүүллүүр сүбэҕэ Дмитрий Глуховскай, музыкант Диана Арбенина, «Грамота.ру» портал кылаабынай эрэдээктэрэ Владимир Пахомов, ТАСС пресс-киинин салайар Николай Яковлев уо.д.а. эспиэрдэр бааллар.

Күөн күрэс түһүмэҕэр Дьокуускай, Рязань, Салехард, Саранскай, Ярославль уонна Томскай киирбиттэрэ. Мантан талан ылыыга нэһилиэнньэ кыттыыта, презентация, бырайыагы сайыннарыыга тэрээһиннэри киллэрии, о.д.а. учуоттаммыт

Дьокуускайга «Тотальнай дьыктаан 2013 сылтан ыытыллар. Манна аахсыйаны тэрийээччинэн ХИФУ филологияҕа бакылтыата, итиэннэ киниэхэ бастакы саҕаланыаҕыттан көмөлөһөр СӨ Национальнай бибилэтиэкэтэ буолаллар.

СӨ Ил Дархан уонна Бырабыыталыстыба пресс-сулууспата

Хаартыска Ил Дархан Айсен Николаев Instagram страницатыттан