Барыанньа арааһын бэлэмниибит

Ааптар: 
Бөлөххө киир:

Бэлиэр күһүммүт тигинээн кэллэ. Хаһаайкалар сир аһын үгэнигэр сылдьаллар. Хас биирдии ыал ийэтэ барыанньаны араастаан, бэйэтэ хайдах сөбүлүүрүнэн буһарар. Ол эрээри, хаһаайкалар кэлин араас ньыманы туһанар буоллулар. Бүгүн туһалаах буолараай диэн олортон аҕыйах ырысыабы сүүмэрдээн үллэстэбит.

edersaas.ru

Отон барыанньа

Саха сиригэр саамай дэлэйдик үүнэр сир аһынан отон буолар. Урукку сылларга отону үксүн буһарар эбит буоллахтарына, кэлин битэмиинин сүтэрбэт туһугар араас ньымалары туһаналлар.

Ирдэниллэр: 3 киилэ отон, 3 киилэ саахар.

Хайдах бэлэмниибит: Ириэнэх отону мясорубкаҕа эрийтэрэбит эбэтэр ньыһыйабыт. Саахар кутабыт уонна уонча мүнүүтэ устата дэлби булкуйабыт. Сөрүүн сиргэ (холодильникка) уурабыт. Тута сииргэ аҕыйаҕы эмиэ бэлэмниэххэ сөп. Маннык ньыманан бэлэмнэммит отон битэмиинин сүтэрбэт.

Дьаабылакалаах отон барыанньа

Үгэс быһыытынан буһарыллыбыт барыанньаттан хал буолбут, арыый атын амтаннааҕы амсайыан баҕарар дьоҥҥо саамай табыгастаах.

Ирдэниллэр: 3 киилэ дьаабылака (кыратык эбиэххэ сөп), 3 киилэ отон, 4 киилэ саахар, кыра уу.

Хайдах бэлэмниибит: дьаабылаканы чараас гына хахтыыбыт, улахан харахтаах түөркэнэн кыралыыбыт. Дьаабылака ортотун туһаммаппыт. Иһиккэ түгэҕинэн кыра уу кутан баран дьаабылакабытын булкуйа-булкуйа буһарабыт. Сымнаабытын кэннэ отоммутун кутан ньыһыйабыт, дэлби булкуйабыт, саахар кутабыт. Оргуйаатын кытта уотун араарабыт.

Курагалаах сугун барыанньа

Ирдэниллэр: 2 киилэ сугун, 1 киилэ курага, 3 киилэ саахар.

Хайдах бэлэмниибит: Иһит түгэҕэр уу кутан курагабытын кыратык буһарабыт, сойо түспүтүн кэннэ блендердиибит. Хаттаан уокка уурабыт, оргуйаатын кытта сугуммутун кутан ньыһыйабыт, сахар эбэбит, кыра уокка тэптэрэ түһэбит.

Моонньоҕон барыанньа

Ирдэниллэр: 3 киилэ моонньоҕон, 2 киилэ саахар, уу.

Хайдах бэлэмниибит: Моонньоҕоммутун комбайнынан эбэтэр блендеринэн ньыһыйабыт. Оргуйбут ууга саахар кутан сироп бэлэмниибит. Сироп оргуйаатын кытта моонньоҕоммутугар кутан биир маасса буолуор диэри булкуйабыт. Иһиттэргэ кутаат, тута тымныы сиргэ уган тоҥоруллар. Таһааран ириэрдэххэ саҥа үргэммит моонньоҕонтон барыанньа бэлэм буола түһэр.

Саахардаах моонньоҕон

Моонньоҕон элбэх битэмииннээҕинэн биллэр сир аһа. Үгүстэр буһараллар. Ол эрээри, оннооҕор, муоруһу буһарарга уу кыраадыһа 40-тан итии буолуо суохтаах, онтон итийдэ даҕаны ханнык баҕарар отон битэмиинин сүтэрэр дииллэр.

Ирдэниллэр: 1 киилэ моонньоҕон, 800 кыраам саахар.

Хайдах бэлэмниибит: Хараара буспут моонньоҕону оргуйбут уунан сууйабыт, онтон сиидэҕэ кутан уутун сүүрдэбит. Мясорубканан эбэтэр блендеринэн ньыһыйыллыбыт маассаҕа саахар кутан уһуннук булкуйабыт. Саахара уулларын курдук суукка устата холодильникка уурабыт. Битэмииннээх моонньоҕон бэлэм.

Банааннаах, апельсиннаах моонньоҕон

Амсайбыт дьон маннык бэлэмнэммит моонньоҕон ураты амтаннаах, минньигэс сыттаах диэн санааларын үллэстэллэр.

Ирдэниллэр: 6 ыстакаан хараарчы буспут моонньоҕон, 1 апельсин, 2 банан, 9 ыстакаан саахар.

Хайдах бэлэмниибит: Апельсины ыраастыыбыт, маҥанын барытын ылабыт. Моонньоҕоммутун, фруктабытын барытын мясорубкаҕа эрийтэрэбит, саахар кутабыт. Оргутуллубут бааҥкаларга кутан аҕыйах хонук холодильникка уура сылдьан сиэххэ эбэтэр тута сииргэ бэлэмниэххэ сөп.

Дөлүһүөнтэн повидло

Ирдэниллэр: 2 киилэ бөдөҥ дөлүһүөн (ыраастаннаҕына 1 киилэ курдук буолар), 700 кыраам саахар.

Хайдах бэлэмниибит: Бөдөҥ дөлүһүөнү ортотунан аҥаардаан баран сиэмэтин барытын ыраастыыбыт. Ыраастаммыт дөлүһүөнү сууйан баран миискэҕэ кутан (уута дөлүһүөммүтүн кыратык сабар буолуохтаах) орто уокка уурабыт. Оргуйбутун кэннэ 25-30 мүнүүтэ булкуйа-булкуйа буһарабыт. Сойо түспүтүн кэннэ блендердиибит, ол кэннэ дуршлагка кутабыт. Мантан киилэни кыайбат пюре тахсар. Салгыы уокка холбоон булкуйа-булкуйа 10-15 мүнүүтэ буһарабыт. Онтон 700 кыраам саахар кутан кыратык тэптэрэ түһэбит. Повидло бэлэм.

Бэлэмнээтэ Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0