Эрдэ суруйбуппут курдук, алтынньы 28 күнүгэр Тутуу ырыынагын быыстапкалыыр саалатыгар «Оҕолорго бырааһынньыгы бииргэ бэлэхтиибит» аһымал дьаарбаҥка үһүс төгүлүн ыытылынна.
edersaas.ru
Дьаарбаҥканы «Одун» оҕо фольклорнай образцовай ансаамбыла, «Кэнчээри» элбэх оҕолоох ыал кулууптара, «Тутуу ырыынага» ХЭУо уонна «Оҕо киинэ» (Дьокуускай к.) тэрийдилэр.
Дьаарбаҥкаҕа киирбит үп Дьокуускай куорат араас норуотун холбуур, 500-чэ оҕо дьарыктанар «Одун» ансаамбыл айар кэнсиэрин тэрийиигэ бэриллиэҕэ. 2019 с. муус устарга кинилэр айар кэнсиэртэрэ былааннанар. Манна ансаамбыл «Норуот кэлэктиибэ» үрдүк аатын СӨ Култуураҕа уонна духуобунуска министиэристибэтин иннигэр бигэргэтиэҕэ. Ансаамбыл оҕолоро, төрөппүттэр уонна учууталлар бу кэнсиэринэн куорат олохтоохторугар уонна ыалдьыттарыгар умнуллубат дьоро киэһээни бэлэхтиир былааннаахтар.
ххх
Билигин «Одун» ансаамбыл уонна «Кэнчээри» элбэх оҕолоох ыаллар кулууптара бу дьоһуннаах дьаһалга күүскэ бэлэмнэнэллэр. Биллэн турар, маннык улахан таһымнаах дьаһал элбэх тэрээһин үлэни уонна аҕыйаҕа суох үбү-харчыны эрэйэр. Аһымал дьаарбаҥка – холбоһуктаах уопсай дьыала. Онуоха оҕолор уонна кинилэр төрөппүттэрэ дууһаларын, сүрэхтэрин биэрбит оҥоһуктарын атыыга таһаараллар. Ону атыттар ис сүрэхтэриттэн үөрэ-көтө атыылаһан, үтүө дьыалаҕа кыттыһаллар, онтон атыттар иллэҥ бириэмэлэрин дьаарбаҥка тэрийиитигэр биэрэллэр.
Дьаарбаҥка иннинэ улахан тэрээһин үлэлэр ыытыллыбыттара. «Кэнчээри» уонна «Одун» учууталлара «Тутуу ырыынага» ХЭУо генеральнай дириэктэрин солбуйааччы уонна СӨ Судаарыстыбаннай Мунньаҕын дьокутаата Иван Даниловы кытары көрсүһэн, аһымал аахсыйатын тэрийии боппуруостарын уонна инники былааннарын дьүүллэспиттэрэ. Иван Иванович оҕо этнокултуурунай киинин тэрийиигэ ансаамбыл бырайыагын интэриэһиргээбитэ. Кини ситиһиилээх тэрилтэ салайааччытын уонна Ил Түмэн дьокутаатын быһыытынан бу бырайыагы толору өйүүр уонна уонна олоххо киириитигэр көмөлөһөр.
ххх
«Одун» ансаамбыл уонна «Кэнчээри» кулууп кыттыылаахтара эппиттэринэн, быйылгы дьаарбаҥка Тутуу ырыынагын кэлэктиибин көмөтүнэн үһүс төгүлүн уонна киэҥ хабааннаахтык ыытылынна. Дьаарбаҥка быйыл саҥа тииптээх оҕо этнокултуурунай киинин тэрийии бырайыагын олоххо киллэрии чэрчитинэн барда. Бырайыагы Арассыыйа ыччат дьыалатыгар федеральнай агентствота уонна «Ыччат айар көҕүлээһинин өйүүр киин» өйөөтүлэр. «Одун» ансаамбыл салайааччыта Туяра Колодезникова, «Ыччат айар көҕүлээһиннэрэ» бырайыактар Бүтүн Арассыыйатааҕы куонкурустарын кыайыылааҕын быһыытынан, инновацияҕа бэйэтин бырайыагын олоххо киллэрэригэр 1 мөлүйүөн суумалаах граны ылбыта.
Дьаарбаҥка, төһө да өрөбүл күн ыытыллыбытын иһин, элбэх киһи кытынна. Оҕолор табаардарын: араас киэргэли, сувенирдары, сибиэһэй туортарын, бөрүөктэрин, тууһаммыт аһылыктары, барыанньалары уо.д.а. бэйэлэрэ билиһиннэрдилэр. Дьаарбаҥкаҕа сылдьыбыт хас биирдии киһи сүрэҕин сылааһын үтүө дьыалаҕа анаата. Кинилэр кэнсиэркэ, куонкурустаах бырагыраамаларга, бэһиэлэй оонньууларга, муода куонкуруһугар (4-9 саастаахтарга) кытыннылар. Чопчулаан эттэххэ, муода куонкуруһугар 24 оҕо, кинилэртэн 17-лэрэ аан бастаан кытынна. Муода куонкуруһун уонна дьаарбаҥка остуолларын дьүүллүүр сүбэҕэ Кристина Соколова («Краса Якутии-2013»), «Саха» НКиХ стилист-визажиһа, дьокутаат Иван Данилов көмөлөһөөччүтэ Иван Кычкин , Анастасия Алексеева – «Сахамедиа» холдинг социальнай ситимнэргэ менеджерэ үлэлээтилэр.
Аһымал дьаарбаҥка ыалдьыттарын уонна уопсай күүһүнэн барыта 50 074 солкуобай хомулунна.
“Одун» ансаамбыл уонна «Кэнчээри» кулууп махтал тылларын Иван Даниловка уонна кини кэлэктиибигэр, администратор Айталина Лонгиноваҕа, Дьокуускай к. «Оҕо (обургу) киинэ» дириэктэрэ Наталья Петроваҕа, «Дорооболоруҥ» педагогическай этэрээт баһаатайдарыгар уонна салайааччыларыгар, ансаамбыл төрөппүтэригэр уо.д.а. махтаналлар. Анастасия уонна Валентин Баишевтар дьиэ кэргэттэрэ биэрбит фотозоналарыгар махталларын тириэрдэллэр. Ураты махтал урбаанньыттарга, спонсордарга ананар.
ЫСПЫРААПКА:
Норуот кэлэктиибэ номнуо 17 сыл Дьокуускай куорат уонна өрөспүүбүлүкэ култуурунай олоҕор саамай көхтөөхтүк кыттар.
«Одуннар» 17 сыл устата толорор маастарыстыбалара үрдүгүнэн өрөспүүбүлүкэҕэ эрэ буолбакка, өрөспүүбүлүкэ таһыгар билиннилэр. Норуот ансаамбыла – Гран-при хаһаайына, фольклорга уонна норуот айымньытыгар өрөспүүбүлүкэтээҕи, Арассыыйатааҕы уонна аан дойдутааҕы куонкурустар, бэстибээллэр лауреаттара. Кинилэр талааннарыгар Арассыыйа үгүс куоратын уонна Кытай, Соҕуруу Корея, Япония, Египет, Франция, Германия, Турция, Италия уо.д.а. дойдулар көрөөччүлэрэ сүгүрүйбүттэрэ. Кэлэктиип бу сыллар тухары биһиги өрөспүүбүлүкэбит баай култууратын уонна фольклорун дьоһуннаахтык билиһиннэрдэ.
Оҕолор бэйэлэрэ эмиэ өйөбүлгэ наадыйар дьоҥҥо бэйэлэрин кыахтарынан көмөлөһөллөр, араас аһымал аахсыйаларга уонна кэнсиэртэргэ куруук кытталлар.
Дьаарбаҥка туһунан сиһилии @odun_folk или https://www.instagram.com/odun_folk/ көрүөххүтүн сөп.
Надежда ЕГОРОВА, «Саха сирэ» хаһыат, edersaas.ru