Кэлиҥҥи кэмҥэ спутниковай сибээс лаппа сайынна. Ол эбэтэр, бу сибээс өҥөтүнэн хайа баҕарар муннуктан, сиртэн-уоттан кэпсэтиэххэ да уонна, саамай сүрүнэ, түргэн интэриниэт ситимин хайа баҕарар туһаныахха сөп.
Дьиҥэр, интэриниэт ситимин, сибээһин тиэрдиигэ оптоволокно утаҕа тардыллан, билигин үгүс улуустар нэһилиэктэригэр түргэн интэриниэт тиийэн, нэһилиэнньэ күннээҕи олоҕор-дьаһаҕар туһанан абыранна.
Ол эрээри, ыраах сытар улуустар уонна нэһилиэктэргэ, биллэн турар, сибээс өттүгэр кэккэ ыарахаттар бааллар. Бу баһаарыыга сүрүн оруолу спутниковай сибээс ылар. Холобур, Муома улууһун Хонуу бөһүөлэгэр интэриниэт суоҕун кэриэтэ. Ол эрээри, кэккэ аҕыйах ыал баар кыһалҕаттан этэҥҥэ тахсыбыттар. Хонуу бөһүөлэгэр олорор түөрт оҕолоох (икки кыыс, икки уол) Валерий уонна Алёна Петровтар Арассыыйа үрдүнэн биллэр-көстөр РТКОММдиэн сибээс операторын спутниковай сибээһин туһанан олус диэн абыраммыттар. Санатар буоллахха, ComNews Research дааннайынан, РТКОММ хампаанньа 2021 сылга спутниковай сибээһи туһаннарыыга саамай элбэх абоненнааҕынан инники күөҥҥэ тахсыбыта. Тэрилтэ күн бүгүн ыраах сытар уонна мөлтөх сибээстээх оройуоннарга спутниковай сибээс көмөтүнэн түргэн интэриниэти тиэрдэр биир улахан өҥөнү толорор. РТКОММ дойдубут интэриэһин уонна сайдарын туһугар спутниковай сибээһи сайыннарыыга кэлиҥҥи кэмҥэ күүскэ ылсан үлэлии сылдьар.
Бу күннэргэ тустаах тэрилтэ салайааччылара өрөспүүбүлүкэ биллэр-көстөр хаһыаттарын, интэриниэт-таһаарыыларын суруналыыстарын кытта көрсөн, спутниковай сибээһи Саха сиригэр сайыннаран эрэллэрин туһунан олус итэҕэтиилээхтик кэпсээтилэр. Ол курдук, «Дьон олоҕун тупсарабыт» («Меняем жизнь людей») диэн олус бэртээхэй, дьоһуннааҕай социальнай хабааннаах бырайыагы олоххо киллэрбиттэрин туһунан РТКОММ генеральнай дириэктэрэ Сергей Ратиев ылыннарыылаахтык кэпсээтэ. Бу маны Саха сиригэр олоххо киллэриигэ биһиги кэллиэгэбит “Эхо столицы” хаһыат кылаабынай эрэдээктэрэ Алексей Толстяков ылсан үлэлээбитэ олус кэрэхсэбиллээх, бэйэтэ быһаарбытынан тустаах тэрилтэ аатыттан Саха сиригэр посол быһыытынан үлэлээбит.
Бу анал бырайыакка маарыын этэн аһарбытым курдук,Муома улууһун Хонуутугар олорор элбэх оҕолоох Алена уонна Валерий Петровтар олохторугар-дьаһахтарыгар спутниковай сибээс хайдах-туох дьайбытын, хайдах-туох көмөлөспүтүн туһунан анал биэрии-устууну оҥорбуттар. Быһа холоон, 15-20 мүнүүтэ устатыгар ыраах хоту олорор ыалларга спутниковай сибээс олохторугар-дьаһахтарыгар хайдах курдук көмөлөспүтүн барытын сиһилии уонна, саамай сүрүнэ, хоту улууска олорор дьон билиҥҥи олохторун-дьаһахтарын бары өттүнэн итэҕэтиилээхтик аһан көрдөрбүттэр. Ыал аҕата Валерий Петров: «Спутниковай сибээһи туһанан олус абыранныбыт. Икки кыыспыт Хабаровскайга фельдшер идэтигэр үөрэнэ сылдьаллар, кинилэри кытта видео-сибээс көмөтүнэн күн аайы кэпсэтэ олоробут. Икки уолбут үөрэхтэригэр интэриниэт сибээһин туһанан абыраннылар. Мин кыралаан уһанарбын сөбүлүүбүн, онно аналлаах үнүстүрүөммүн барытын интэриниэт көмөтүнэн сакаастаан аҕалтарбытым. Аны туран, хайдах-туох уһанары барытын ютубтан көрөн-истэн үөрэнним. Спутниковай сибээспит үчүгэй буолан, күнүс буоллун, түүн буоллун түргэн интэриниэти бэркэ диэн туһана олоробут. Бу иннинэ түүн 2 чаас саҕана киирэн туһанааччыбыт. Билигин оннук суох. Онон спутниковай сибээс бары өттүнэн абыраллааҕын күннээҕи олохпутугар-дьаһахпытыгар туһанан үчүгэйдик биллибит», — диэн санаатын үллэһиннэ.