Сотору кэминэн үлэ төлөбүрүн алын кээмэйэ (МРОТ) уонна тиийинэн олоруу алын кээмэйэ, ону тэҥэ, бары социальнай төлөбүрдэр, биэнсийэ, бүддьүөт үлэһиттэрин хамнастара үрдүөхтэрэ диэн ТАСС суруйар. Бу туһунан бэрэсидьиэн Владимир Путин бырабыыталыстыба мунньаҕар эппитэ.
Бэрэсидьиэн кылгас кэм иһигэр төһө үп-харчы ирдэнэрин ааҕан-суоттаан, докумуоннары бэлэмнииргэ сорудахтаабыта. Ону тэҥэ, үлэтэ суох хаалбыт дьоҥҥо хайдах көмөлөһөр, ханнык көдьүүстээх миэрэлэри ылынар туһунан ырытан көрүөхтээхтэр. Холобур, социальнай хантараак бырагырааматын кэҥэтэн, о.д.а. көдьүүстээх миэрэлэр ылыллыахтаахтар.
Сыана үрдүү турар кэмигэр нэһилиэнньэ дьадайбатын, дохуота түспэтин туһугар мантан да атын кэккэ миэрэлэр ылыллыахтара.
Санатар буоллахха, Саха сиригэр олохтоммут тиийинэн олоруу кээмэйэ: нэһилиэнньэҕэ – 18 726 солкуобай, үлэлиир дьоҥҥо – 20 411 солкуобай, биэнсийэлээхтэргэ – 16 104 солкуобай, оҕоҕо – 19 457 солкуобай (Дьокуускай куоракка уонна киин улуустарга). Бу сылга тиийинэн олоруу алын кээмэйэ кыратык үрдээбитэ.
Ангелина Васильева, “Саха сирэ” хаһыат, edersaas.ru