Нам улууһун Бартыһаан нэһилиэгэр «Үтүө дьулуур (волонтер)» сылыгар анаан «Бартыһааҥҥа — 100 үтүө дыала» диэн хамсааһын саҕаланна.
edersaas.ru
Бу хамсааһыны тэрийии туһунан санаа нэһилиэк баһылыгын мунньаҕар саҕыллыбыт. Нэдиэлэ саҥатынааҕы тэрээһин мунньахха уопсастыбаннай түмсүүлэр салайааччылара, дьокутааттар, тэрилтэ салайааччылара кытталлар. Бу үгэскэ кубулуйбут мунньахха нэһилиэк кэскиллээх боппуруостарын быһаарсаллар.
— 90-с сыллар саҥаларыгар күн бүгүҥҥэ диэри нэһилиэкпит сүрүн тутуулара: балыыһа, почта, спортзал, музей, бибилэтиэкэ «Үтүө дыала» хамсааһын чэрчитинэн тутуллубуттара. 2010 сыллаахха нэһилиэк уопсастыбаннаһа бырабыытылыстыба отчуотугар кэлбит салалтаҕа: «Оскуолабыт тутуутун үп суох диэн 2020 сылга көһөрбүккүт. Биһиги, олохтоохтор, бэйэбит күүспүтүнэн осуолабыт бырайыагын оҥотторорго үбү хомуйуохпут. Онон оскуола тутуутун түргэтэтиҥ», — диэн көрдөспүппүт. Ол кэнниттэн 2009 с. нэһилиэк олохтоохторугар оскуола тутуутугар анаммыт «Саҥа үйэҕэ — саҥа оскуола» диэн ааттаан марафон ыыппыппыт. Онно бааһынай уонна кэтэх хаһаайыстыбалар идэһэ кэмигэр 35 ынах сүөһүнү, 15 убаһаны өлөрөн, харчытын оскуола тутуутун бырайыагын оҥорууга биэрбиттэрэ. Биирдиилээн дьон, тэрилтэлэр санаалара кэлэн, эмиэ харчынан киллэрбиттэрэ. Ол түмүгэр 2010 сыллаахха бырайыак докумуонун кэмигэр оҥотторон, 2014 сыллаахха 165 миэстэлээх орто оскуола тутуллан, үлэ5э киирбитэ, —— диэн кэпсиир олохтоох дьаһалта баһылыгын солбуйааччы Полина Скрябина.
Нам улууһун Бартыһааныгар 1044 киһи олорор. Нэһилиэк олохтоохторо олус көхтөөх дьон. Дэлэҕэ да нэһилиэк тэрилтэлэрин бэйэлэрэ көҕүлээн, «Үтүө дьыала» хамсааһыныгар кыттан туттарыахтара дуо? Былырыын маҕаһыыннарыгар «Үтүө санаа долбуурун» аһан үлэлэппиттэрэ, күн бүгүнүгэр диэри наадыйар дьоҥҥо табаарынан өйөбүл буола турар.
— Быйылгы «Үтүө дьулуур (волонтер)» сылын биһиги курдук көхтөөх нэһилиэк олохтоохторо олус үөрэ ылынныбыт. Ол курдук, баһылык планеркатыгар сылы быһа 100 үтүө дьыаланы тэрийэргэ былааннаммыппыт. Бу күннэргэ тэрилтэлэр, уопсастыбаннай түмсүүлэр бэйэлэрин бырайыактарын оҥорон, нэһилиэккэ баҕа өттүнэн үтүө дьыалыаны оҥоруу саҕаланна. Аахсыйаны бастакынан дьахтар сэбиэтэ саҕалаата — түөрт тыыл бэтэрээнигэр биэс ыйга улуустааҕы «Эҥсиэли» хаһыакка суруттардылар.
Кинилэри ыччат сэбиэтэ өйөөн, «Эйэ саллаата» Улуу Кыайыы скверин хаарын ыраастаатылар.
Ыччаттар бу маннык тэрээһиннэри бэрт элбэҕи былааннаатылар. Бастакы көҕүлээһин бэрт көхтөөхтүк барда.
Онтон эмчиттэр көрүүлэригэр сылдьар киин ыарыһахтарыгар уонна ытык кырдьаҕастарыгар кэнсиэрдээтилэр, кинигэ, сурунаал, хаһыат бэлэхтээтилэр, — диэн иһитиннэрдэ Полина Скрябина.
«Бартыһааҥҥа — 100 үтүө дыала» диэн хамсааһын чэрчитинэн Үтүө дьулуур сылыгар анаммыт тэрээһиннэр, бырайыактар сылы быһа ыытыллыахтара.
Елена ПОТОЦКАЯ, «Саха сирэ», edersaas.ru
Хаартыска — олохтоох дьаһалта архыыбыттан.