Нам улууһун Партизан нэһилиэгэр куйаар ситиминэн уһулуччулаах судаарыстыбаннай диэйэтэл Максим Аммосов үбүлүөйдээх 125 сылыгар анаан Төрөөбүт тыл күнүгэр айар талааннаах дьон «Талааҥҥын таба тайан» тэрээһиннэрэ бэрт көхтөөхтүк буолан ааста.
Биһиги уопсастыбаннай кэрэспэдьиэммит Полина Скрябина иһитиннэрбитинэн, куйаар ситиминэн ыытыллыбыт бырайыак олус табылынна.
— Төһө да кыра нэһилиэк буолларбыт, сыстыганнаах дьаҥ кэмигэр үлэ саҥа көрүҥүн хото баһылаан эрэбит. Ол курдук, дьоммутун араас сонун бырайыактарынан сэргэхситэбит.
Хоһоон айар дьоммут ааттарын үйэтитэн, хаһан да хоһоон аахпатах дьону тардар сыалтан, бэйэтин аата да этэринии, «Талааҥҥын таба тайан» диэн “Хомус-фольклор” култуура дьиэтин үлэһиттэрэ олус сэргэх тэрээһини оҥорбуттарын нэһилиэкпит олохтоохторо олус сэргээтилэр.
Киэн туттар айар куттаах дьоммут хомоҕой хоһооннорун сэргэхтик аахпыт дьоммутугар барҕа махталбытын тиэрдэбит.
Эһиги талба талааҥҥыт салгыы сайдан, ураты дьоҕургут уһуктан, дьон-сэргэ биһирэбилин, махталын өрүү ыла туруҥ диэн алгыыбыт!
… Ити курдук, хантан эрэ ким эрэ сааратарын кэтэспэккэ, маннык интэриэһинэй тэрээһиннэри ыытыахха сөбүн бартыһааннар холобурдарыгар көрөбүт.
Елена ПОТОЦКАЯ, “Саха сирэ” хаһыат, edersaas.ru