Нам улууһун Бартыһаан нэһилиэгэр норуот көҕүлээһинин бырагырааматын чэрчитинэн үлэ тэтимнээхтик ыытыллар.
edersaas.ru
Олохтоохтор бу нэһилиэктэри тупсарыыга туһаайыллыбыт тосхоллору олус сэргииллэр уонна биһирииллэр. Бу туһунан баһылык солбуйааччыта Полина Скрябина санаатын маннык үллэстэр;
— Нэһилиэкпит 2012 сылтан чөл олох тирэх нэһилиэк быһыытынан сайдар. Онон «чөл олох уонна спорт» диэн баран, эдэрдиин-эмэнниин муннукка ытаабыт дьоммут. Хаалыктаах хаамыынан дьарыктанааччы — нэһилиэк аҥара. Эр дьон «кроссфит» диэн спорт саҥа көрүҥүнэн үлүһүйэн туран дьарыктаналлар. Аны манна сүүрүүнэн дьарыктанааччыларбытын эбэн кэбис. Онон Тыа хаһаайыстыбатын министиэристибэтин иһинэн үлэлиир «Тыа сирин кэлимник сайыннарыы» бырагыраама чэрчитинэн «футбол хонуутун» оҥорбуппут. Быйыл күһүн 2,5 мөл. солк. суумалаах «сүүрэр суол» («беговая дорожка») үлэҕэ киирдэ.
Онон стадиоммут олус тубуста. Кэнчээри ыччаппыт куорат оҕолоруттан итэҕэһэ суох бэртээхэйдик оҥоһуллубут сиргэ дьарыктанар кыахтаннылар диэн үөрэбит.
... Ити курдук араас бырагыраамаларга кыттар нэһилиэк, биллэн турар, тупсаҕай көстүүлээх уонна сайдыылаах.
Елена ПОТОЦКАЯ, «Саха сирэ» хаһыат, edersaas.ru