Бүгүн Нам улууһун Бартыһаан нэһилиэгэр суолталаах тэрээһин куйаар ситиминэн буолла.
edersaas.ru
Тоҕус Дьоруой ийэҕэ анаммыт «Дьоруой ийэлэргэ — Албан аат» дьоһун мемориал аһыллыытын туһунан нэһилиэк баһылыгын солбуйааччы Полина Скрябина бу курдук билиһиннэрэр:
— Дьоруой ийэлэрбитин үйэтитэр туһунан санааны нэһилиэк дьахталларын сэбиэтин салайааччы Сардаана Бережнева көтөхпүтэ. Улуу Кыайыы 75 сылыгар анаан өйдөбүнньүк сир буоллун, эдэр ыаллар мантан алгыс ылан алаһа дьиэлэрин буруотун унаарыттынар диэн санааттан бу бырайыагы олоххо киллэриини саҕалаабыппыт. Мемориал арыллыытыгар бары күүспүтүн холбоотубут. Бастаан бырайыакпытын улуус граныгар көмүскээн 100 тыһ. солкуобайы ылбыппыт. Нэһилиэк дьаһалтата 70 тыһ. солк. биэрбитэ. Дьахтар сэбитэтин чилиэннэрэ, мемориалга үйэтитиллибит Дьоруой ийэлэр оҕолоро уонна сиэннэрэ кыттыһан, уопсайа 320 тыһ. солк. үбү хомуйан, быйылгы сыл түмүктэниэн иннинэ санаа хоту дьоһун бэлиэни оҥотторон үлэҕэ киллэрдибит.
Бартыһааннар, ити курдук, Ийэ дойдуга бэриниилээх буолуу сылыгар төрөөбүт нэһилиэктэрин Дьоруой ийэлэрин ааттарын үйэтиппиттэрэ хайҕаллаах суол.
Елена ПОТОЦКАЯ, «Саха сирэ» хаһыат, edersaas.ru