Быйыл Дьокуускай куораттааҕы 2 №-дээх национальнай политехническэй оскуола төрүттэммитэ 80 сылын туолар. Онно анаан хаартысканан бырайыагы саҕалыыбын.
edersaas.ru
Биhиги оскуолабыт биир чулуу педагога Галина Анисимовна Хайдурова этэ. Кини — биллиилээх старшай пионер баһаатай. Бу хаартыскаҕа Ярославскай аатынан пионерскай дружинабыт Улуу Кыайыы 30 сылын бэлиэтээн, параадтаан иhэр. Өрөспүүбүлүкэҕэ соҕотох барабанщиктар этэрээттэрэ. Этэрээппит 50 барабанщиктаах этэ. 50 оҕо тэҥҥэ хааман, «Суворовскай маршы» ньиргитэрбит долгутуулаах, үөрүүлээх буолара.
Ол элбэх сыралаах үлэттэн тахсыбыта. Кыһыны быһа өрөбүл күҥҥэ сарсыарда 8 чааска оскуолабытыгар сүүрэрбит. Галина Анисимовна көрсөрө уонна барабаан биэрэн баран эрээккэ биэстии оҕону туруорара. Онтон дьарыкпыт саҕаланара, көрүдүөр устун барабаанныы-барабаанныы 2-3 чаас хаамар этибит. Маҥнай туора-маары, сыыһа-халты хаамыталыырбыт. Ол да буоллар, санаабытын түһэрбэккэ дьарыктанан, кэлин олох биир киһи курдук барабаанныыр, хаамар буолбуппут. Биһиги Ярославскай аатынан дружина барабанщига буоларбытынан киэн туттарбыт.
Дьокуускай куорат 2-с №-дээх оскуолатын выпускниктара, ахтыыларгытын, хаартыскаларгытын миэхэ bupi@inbox.ru электроннай аадырыска ыытыаххытын эбэтэр оскуолаҕа, Ярославскай аатынан уулусса 8/1 нүөмэрдээх дьиэтигэр, 230 кабинекка киллэрэн биэриэххитин сөп. Барытын түмэн мусуойбутугар истиэндэ оҥоруохпут уонна бу курдук бэчээккэ таһаарыахпыт.
Юлия БУГАЕВА, Дьокуускай куорат 2-с №-дээх оскуолатын история учуутала.