Горнай улууһун өттүттэн Кэптин 44 №-дээх уота, Орто Сурт 59 №-дээх уота Бүлүү улууһун Баппаҕаайы нэһилиэгин сиригэр киириэхчэ киирбэккэ турар.
Нэһилиэк баһылыга Егор Николаев баһаартан көмүскэнэр үлэлэри эрдэттэн былааннаахтык тэрийдэ. Бастакынан, Арыылаах, Сортуол учаастактарыттан дьоннору дэриэбинэҕэ көһөрдүлэр.
Бүлүүтээҕи “Автодор” тэрилтэ бульдозера дэриэбинэ тулатынан уонна Арыылаах учаастагын эргитэн, минбалаһаны оҥордо. Сортуол учаастагар олохтоох тыраахтарынан баһаартан көмүскэнэр үлэни ыытта, сайылык тулатын булууктаата.
Нэһилиэккэ баһаар кэлэр түгэнигэр уу баһар сиргэ Николаев Алексей Маркович аймахтарын кытта массыына күөлтэн ууну эрэйэ суох баһарын курдук суолу бөҕөргөтөн оҥордулар. Федеральнай суол таһыттан ууну үс туочукаттан баһар сирдэри бэлэмнээтилэр. Дэриэбинэҕэ уонна Арыылаах учаастагар бөртөлүөт түһэр былаһааккатын бэлэмнээтилэр.
“Олимп” миэбэл салонуттан аҕыс устуука РЛО ыыппыттарын туппуттар, Бүлүүтээҕи аэропорт уонна аэронавигация тэрилтэтин үлэһиттэрэ ыыппыт буочукалаах сэлээркэлэринэн бүгүн тыраахтардары заправкалаабыттар, Таскин Алексей Алексеевич оҕолоро биир буочука сэлээркэни биэрбиттэр. Онон көмөлөспүт дьоҥҥо улаханнык махтаналларын туһунан баһылык Егор Афанасьевич этэр.
Бүлүүттэн улуустааҕы суһал штабтан Андрей Яковлев-Чуос, «Саха сирэ» edersaas.ru сайтка анаан.