Алмаастаах хампаанньа социальнай бырайыагын быһыытынан Үөһээ Дьааҥы улууһун киинигэр 30 эмтэнэр миэстэлээх терапевтическай уонна оҕо салаатын икки этээстээх балыыһата, поликлиниката тутулла турар. Саҥа балыыһаны 2020 сыл төрдүс кыбаарталыгар диэри тутан бүтэриэхтээхтэр.
Үрүҥ халааттаах аанньаллар манна биир күн иһигэр 180 киһини көрөр кыахтаныахтара. Билигин дьиэ көҥдөйүн тутан таһаардылар, сотору кэминэн үрдүк бүрүйүөхтэрэ, ис-тас үлэтин ситэриэхтэрэ.
Эһиил дьиэни ититэр, сылытар матырыйаалларынан сабыахтара, хостор быыстарын тутуохтара, кирилиэһи ууруохтара, кыаммат дьон киирэр суолун оҥоруохтара, ону таһынан, араас эмтиир оборудованиены тиэйэн аҕаларга дуогабар түһэрсиэхтэрэ.
Аан дойдуга тоһуттар тымныытынан аатырар хотугу оройуоҥҥа саҥа балыыһа тутуутун 250 мөлүйүөн солкуобайга «АЛРОСА» хампаанньа уонна аҥаарын Үүнэр көлүөнэ тус сыаллаах пуондата үбүлээтилэр.
Улуус баһылыга Гаврил Чириков:
— Баатаҕайга дьиэ-уот 70% бары эргэрэн-эмэҕирэн бүттүлэр, үгүстэрэ хаарбах туруктаахтар. Урукку балыыһа көтүрүллүбүтэ, онон нэһилиэнньэ саҥа дьиэ киирэрин эрэнэ-долгуйа күүтэр. Дьон доруобуйатын туругун чинчийэр саҥа анал тэриллэри туруордахпытына, сырыы аайы куоракка көрдөрүнэ барарга ороскуоттара да кыччыа этэ. Олорор дьиэ суох, усулуобуйа мөлтөх буолан, биһиэхэ быраастар тиийбэттэр. «Земскай доктор» бырагырааманан кэлбит эмчиттэр үлэлээн бүттүлэр да куоракка баран хаалаллар. Онон ити мөлүйүөннэринэн үлэлии барбыт сирдэригэр дьиэ тутталлара буоллар диэн баҕа санаалаахпын. Итинэн сибээстээн, биир сүрүн көрдөһүүбүт эдэр үлэһиттэргэ элбэх кыбартыыралаах дьиэ тутан биэрдэхтэринэ биирдэ быраастары олохсутуу кыаллыан сөп. Билигин саҥа кэлбит дьоҥҥо балыыһа дьиэ куортамнаан биэрэр, ол даҕаны харчы көрүлүннэҕинэ.
Ольга Гатилова, Дьааҥы улууһун киин балыыһатын кылаабынай бырааһа:
— Саҥа балыыһабыт үлэҕэ киирдэҕинэ, 12 тыһыынча нэһилиэнньэлээх бөһүөлэккэ медицинскэй тэрилтэ ирдэбилинэн, УЗИ, рентген, флюорография, анаалыс ылар лаборатория, стоматолог, лор, офтальмолог баар буолуохтара. Урут дьон 1965 сыллаахха тутуллубут биир этээстээх мас хаарбах поликлиникаҕа көрдөрөр этэ. Онон саҥа балыыһа аһылларын бары олус күүтэллэр. Ыраах сытар учаастактарга терапевтар, Баатаҕайга онколог тиийбэт. Оройуон киинигэр биэс “Земскэй доктор” кэлбитэ даҕаны, эдэр дьон хас да оҕолонон олороллор. Аны 50-чалаах быраастар үлэлии кэлиэхтэрин баҕараллар да, саастарынан сөп түбэспэттэр. Доруобуйа харыстабылын үлэһиттэригэр анаммыт «Арктика» бырагыраамабыт быйыл тохтоон хаалла. Онон кыра нэһилиэктэрбитигэр үлэһиттэринэн хааччыллыы мөлтөх. Үөрэхтэрин бүтэрбит оҕолор куораттан чугас оройуоннарга бара сатыыллар. Кинилэр «Земскэй доктор” таһынан бырамыысыланнас баар сиригэр эбии харчы көрөллөр. Усулуобуйа суоҕуттан уһук хоту үлэлии барыан баҕалаах киһи олох аҕыйах.
Марианна Тыртыкова, «Саха сирэ» хаһыат, edersaas.ru