Саха сиригэр эбии 10 кислородтаах ыстаансыйа аҕалылынна. Бу тэриллэр Өрөспүүбүлүкэтээҕи 1 №-дээх балыыһаҕа-Мэдиссиинэ национальнай киинигэр, Өрөспүүбүлүкэтээҕи 2 №-дээх балыыһаҕа-Суһал мэдиссиинискэй көмө киинигэр уонна Мииринэй куорат оройуоннааҕы киин балыыһатыгар бэрилиннилэр.
СӨ Доруобуйа харыстабылын министиэристибэтэ эрдэ иһитиннэрбитин курдук, өссө 8 ыстаансыйа Дьокуускайга өрөспүүбүлүкэтээҕи килиниичэскэй балыыһаҕа аҕалылыллыахтаах. Маныаха СӨ бырабыыталыстыбатын анал быһаарыытынан саппаас пуондатыттан суһаллык үп көрүллүбүтэ. Хантараак усулуобуйата түөрт эрэ ый иһинэн толорулунна.
Сокуон барылын аныгы ирдэбиллэринэн, доруобуйа харыстабылын эйгэтигэр анал концентратордарга эрэ оҥоһуллубут кислород туһаныллар.
Кэнники сылларга кислород саппааһын элбэтэргэ, кислородка наадыйыыны толору хааччыйарга СӨ бырабыыталыстыбата балыыһалары улахан кыамталаах кислород ыстаансыйаларынан эбии хааччыйарга улахан элбэх үлэни ыытта.
Ол курдук, 2020-21 сылларга өрөспүүбүлүкэтээҕи килиниичэскэй балыыһаҕа, 3 №-дээх өрөспүүбүлүкэтээҕи килиниичэскэй балыыһаҕа, оҕо сыстыганнаах ыарыыларын килиниичэскэй балыыһатыгар, Алдан, Мииринэй, Нерюнгри, Мэҥэ Хаҥалас, Айхал, Өлүөхүмэ, Лэнскэй Оройуоннааҕы киин балыыһаларыгар араас кыамталаах ыстаансыйалар атыылаһыллыбыттара. Ону таһынан 238 кислород концентратынан өрөспүүбүлүкэтээҕи, куорат уонна оройуоннааҕы балыыһалар сэбилэннилэр.
Надежда ЕГОРОВА, «Саха сирэ», edersaas.ru