Балыыһалар тиэхиньикэлэрэ эргэрбиттэрэ болҕомтоҕо ылылынна

СӨ баһылыга Айсен Николаев Дьокуускай к. медицинскэй тэрилтэлэригэр сылдьар кэмигэр эмтиир тэриллэр эргэрбиттэрин болҕомтоҕо ылбыта.

edersaas.ru

«Эмтиир тэрилтэлэри кэрийэн көрүү түмүгэр МРТ уонна УЗИ аппарааттар курдук биһиги саамай туһанар медицинскэй тэриллэрбит олус эргэрбиттэрэ, элэйбиттэрэ билиннэ. Үгүс тэриллэр нэһилиэнньэҕэ туһалаабыттара уонтан тахса сыл буолбут», – диэбитэ уонна доруобуйа харыстабылын сүрүннүүр, эмтиир тэрилтэлэр салгыы хааччыллыахтарын туһунан эппитэ. Ол иһигэр, Медицина национальнай киинэ, кардиология диспансера, куораттааҕы клиническэй балыыһа, Өрөспүүбүлүкэтээҕи 2 №-дээх балыыһа материальнай-техническэй баазалара бөҕөргөтүллэллэрэ былааннаныа.

Биһиги исписэлиистэрбит бигэргэтэллэринэн, кэккэ медицинскэй тэриллэр сорох көрүҥнэрэ билигин номнуо оҥоһуллубаттар, бэл, саппаас чаастара да суох.

Манна даҕатан эттэххэ, Айсен Николаев бэҕэһээ, сэтинньи 14 күнүгэр, РФ бырабыыталыстыбатын премьер-миниистирэ Дмитрий Медведевы кытары көрүстэ. Көрсүһүүгэ Айсен Николаев өрөспүүбүлүкэҕэ доруобуйа харыстабыла булгуччулаах медицинскэй страховкалааһын федеральнай пуондуттан ситэ үбүлэммэккэ кэлбитин, онон материальнай-техническэй база толору хааччыллыбатаҕын бэлиэтээтэ.

Онтон соторутааҕыта доруобуйа харыстабылыгар үбүлээһини ааҕыы ньымаларыгар уларыйыылар киллэриллэннэр, эһиилгиттэн булгуччулаах медицинскэй страховкалааһын федеральнай пуондатыттан эбии 6,7 млрд солкуобай бэриллиэҕэ. Оччотугар, балыыһаларбыт материальнай-техническэй баазалара, чуолаан, ыарыыны быһаарар уонна эмтиир тэриллэр саҥардыллыахтара турдаҕа.

ЫСПЫРААПКА:

МРТ-аппараат хаачыстыбатыгар улахан оруолу, бастатан туран, тэрил көрүҥэ уонна үлэлиир кыаҕа ылар. Балыыһаҕа ханнык «тимир» турарыттан аппараат бэчээттээн таһаарар, салгыы быраас көрөн үөрэтиэхтээх хаартыскалара төһө кырдьыктаахтара мантан улахан тутулуктаах.

Томограф көрүҥүттэн көрөн, тустаах томографка ханнык чинчийиилэри оҥоруохха сөбө чуолкайданар. Тиэхиньикэ эргэрбит уонна алдьаммыт буоллаҕына, сорох уорганнар үчүгэйдик көстүө да суохтарын сөп. Ону сэргэ, томограф хаачыстыбата чинчийии төһө түргэнник оҥоһулларыгар дьайар, көрдөрөөччү бэйэтин табыгастаахтык сананарыгар оруолу  эмиэ ылар.

Надежда ЕГОРОВА, «Саха сирэ» хаһыат, edersaas.ru