Өрөспүүбүлүкэтээҕи 2 №-дээх балыыһа—Суһал медицинскэй көмө киинин эр дьоно Дойду көмүскэлин күнүн көрсө кроссфикка многоборьеҕа күрэхтэстилэр. Балыыһа профкома тэрийбит былаһааккатыгар 15 эр бэрдэ таҕыста. Тренажер дьоҕус саалатыгар элбэх киһи дьонноругар “ыалдьа” муһунна.
edersaas.ru
Кроссфикка чэпчэки уонна ыарахан атлетика эрчиллиилэрэ, гимнастика, пауэрлифтинг уонна гиирэ спорда киирсэллэр. “Кроссфит – куруук араастаһа турар функциональнай хамсаныылар систиэмэлэрэ”, — диэн «СrossFit Ykt» кулууп тренерэ Татьяна Матвеева быһаарда.
Кырдьыга да, көрө олорон ким эрэ тулуйбакка былаһааккаттан туораан тахсыа диэн ыксыы олороҕун. Иллээх-эйэлээх эйгэ баарын үрдүнэн, былаһааккаҕа илин-кэлин былдьаһыы тыына үөскээтэ, ким да кимиэхэ да кыайтарыан баҕарбата.
Күрэхтэһии кэнниттэн биллибитинэн, үгүстэр маннык турнирга аан бастаан кытыннылар, ол гынан баран, кинилэр инникитин кроссфиты батыһааччылар буолаллара чуолкай.
Очколары ааҕар кэмнэригэр тэрийээччилэр “ыалдьааччылар” ортолоругар эмиэ куонкурус биллэрдилэр. Кыайыылааҕынан, биллэн турар, эр киһи таҕыста. Кини “былааҥка” балаһыанньаҕа 4 мүнүүтэ 30 сөкүүндэ турда.
Кыайыылаахтарга мэтээллэри уонна харчынан бириэмийэни балыыһа профкомун бэрэссэдээтэлин э.т. Александр Яковлев туттарда.
Зоя ИГНАТЬЕВА, edersaas cайтка анаан