Бүгүн өрөспүүбүлүкэтээҕи офтальмологическай килиниичэскэй балыыһа кылаабынай бырааһа Иван Луцкан быһа сибээскэ ыйытыыларга хоруйдаата.
Офтальмологическай балыыһа пандемия кэмигэр хайдах үлэлиирий уонна онно хайдах көрдөрүөххэ сөбүй?
—Балыыһа штатнай эрэсииминэн үлэлиир. Бэрт кыратык эрэ хааччахтаатыбыт. Өскөтүн урукку өттүгэр сүбэ-ама ыларга судургутук кэлиэххэ сөп эбит буоллаҕына, билигин итинник ньыма тохтотуллан турар. Биһиэхэ улуус балыыһатыттан, куорат поклиникатыттан суруттаран эрэ баран кэлэҕит. Олорор сиргитинэн көрдөрөр балыыһаҕыт офтальмолога направление суруйан биэрэр. Балыыһаҕа көдөрөр бириэмэҕит болдьонор.
Филиаллар тустарынан ыйытыыга.
—Балыыһабыт хас да филиаллаах. Итиэннэ быйыл өссө эбии филиаллары аһары былаанныыбыт. Филиалларбыт Ньурбаҕа, Ленскэйгэ, Нерюнгрига, Өлүөхүмэҕэ, Сунтаарга, Зырянкаҕа, Чульмаҥҥа бааллар. Маны сэргэ, Дьокуускай куорат мэдиссиинэҕэ киинигэр филиал аһыахпыт. Манна куорат нэһилиэнньэтэ көрдөрүнүө. Итиэннэ Алдаҥҥа уонна Уус Алдаҥҥа филиаллары аһыахпыт.
Ньурба баазатыгар оройуоннар икки ардыларынааҕы киини оҥорорго сөбүлэһии түһэристибит. Онно кулун тутар бүтүүтүгэр, муус устар саҥатыгар тиийэн, катарактаны суһаллык эмтээһиҥҥэ үлэ ыытыллыа. Оччотугар Бүлүү эҥэр улуустартан Дьокуускайга кэлэ сатаабакка, балыыһа филиалыгар, Ньурба куоратыгар эпэрээссийэлэр оҥоһуллуохтара.