Балык ырыынак сыанатыттан 25-40 бырыһыан чэпчэкитик атыыланыа
Эрдэ иһитиннэрбиппит курдук, Дьокуускайга Хомсомуол болуоссатыгар бүгүн-сарсын, киин куорат олохтоохторо уонна ыалдьыттара өрүүр күннэригэр, “Саха сирин балыга – 2017” өрөспүүбүлүкэтээҕи дьаарбаҥка-быыстапка ыытыллар. Санатан эттэххэ, маннык киэҥ хабааннаах атыы-эргиэн иккис төгүлүн эрэ тэрилиннэ.
edersaas.ru
Былырыын “Сайсары” бааһынай ырыынагын кэтэҕэр “Дохсун” спорт комплексын тэлгэһэтигэр буолбута. Онно дьон уһун-синньигэс уочаракка туран тоҥмута-хаппыта уонна массыына туруорарга сирэ-уота кыараҕас этэ. Быйыл ону аахсаннар, киэҥ-куоҥ сиргэ тэрийэн эрэллэр. Хотугу улуустартан кэлбит 20-чэ община, кэпэрэтиип уонна астыыр-үөллүүр тэрилтэ бэйэлээх бэйэлэрин бородууксуйаларын күргүөмүнэн атыылаатахтарына, улахан анньыһыыта суох уонна тииһимньилээх буолуо диэн күүтэбит.
Бу улахан тэрээһини Арктика дьыалаларыгар судаарыстыбаннай кэмитиэт уонна “Якутская ярмарка” АУо сүрүннүүллэр. Кэмитиэт балык хаһаайыстыбатыгар салаатын салайааччыта Прокопий Кириллин этэринэн, балыксыт хаһаайыстыбалар быһаччы атыылыыр буоланнар, балык ырыынакка атыыланарыттан 25-40 бырыһыан чэпчэки сыанаҕа атыыланыаҕа. Холобур, чыыр 250-350, уомул 200-300, муксуун 250-400, күндүөбэй 180-200 солкуобай сыаналаах буолуохтара. Биллэн турар, сыана түһэрэ-тахсара балык кээмэйиттэн уонна хайдах астаммытыттан, ханнык ньыманан тоҥоруллубутуттан тутулуктаах. Арктика улуустарыгар билигин сүрүннээн “шоковай” диэн ааттанар ньыманан анал камераларга тоҥороллор. Ууттан таһаараат тоҥоруллубут балыгы сиикэйдии кыһан сиэххэ сөп.
Прокопий Афанасьевич балык сибиэһэйин бигэргэтэн: “Сайын-күһүн бултаммыт балыктары “Туймаада-Агроснаб” АУо аҕыйах хонуктааҕыта “Магдебург” уонна “Михаил Мальчиков” аалларынан тиэйэн аҕалла. Ол иһигэр алтынньыга кытта бултаммыт балыктар бааллар”, — диэтэ. Өрүс балыгын сэргэ быйылгы муҥха собото эмиэ удамыр сыанаҕа атыыга тахсыа.
Онон киин куорат олохтоохторо уонна ыалдьыттара бу күннэргэ Хомсомуол болуоссатыгар кэллэххитинэ, кэмсиниэххит суоҕа. Эһиэхэ анаан үөрүнньэҥ хотугу дьон ырыа-үҥкүү бэлэхтиэхтэрэ итиэннэ бириистээх викториналар, куонкурустар күүтэллэр. Тоҥ балыгы кыһарга күрэхтэһии тэриллиэ. Өссө саамай кэрэхсэбиллээҕэ – “Балык ыраахтааҕыта” диэн саамай улахан балык куоталаһыыта ыытыллыа. Саамай бөдөҥүнэн билиниллибит балыгы бултаабыт хаһаайыстыба аукциоҥҥа туруорар. Былырыын 10-тан тахса киилэлээх чыыр добуоччу ыарахан сыанаҕа барбытын санатабыт.
Василий НИКИФОРОВ, «Саха сирэ» хаhыат, edersaas.ru