Балаҕан ыйын 1 күнүгэр өрөспүүбүлүкэ салалтата бииргэ үлэлээһин сөбүлэҥин Арассыыйатааҕы Балык хаһаайыстыбатын уонна океанография научнай-чинчийэр институтун (ВНИРО) кытта түһэристэ.
edersaas.ru
СӨ баһылыгын уонна бырабыыталыстыбатын дьаһалтатын пресс-сулууспата иһитиннэрбитинэн, суолталаах докумуоҥҥа Ил Дархан Айсен Николаев уонна ВНИРО салайааччыта Кирилл Колончин илии баттаатылар. Докумуоҥҥа олоҕуран, өрөспүүбүлүкэҕэ балык көрүҥүн элбэтиигэ, туһаныыга научнай хайысхалаах буолуоҕа.
— Дойду балык хаһаайыстыбатын үлэтин чинчийэр тутаах институтун кытта бииргэ үлэлээһиммит биһиги өрүстэрбитигэр уонна күөллэрбитигэр ыытар чинчийии үлэбитин биллэрдик бөҕөргөтүөҕэ уонна бу хайысханы сайыннарыыга олугу ууруоҕа, — диэн бэлиэтээтэ Ил Дархан Айсен Николаев.
ВНИРО салайааччыта Кирилл Колончин бэлиэтээбитинэн, кини салайар института Арассыыйаҕа уу ресурсатын боппуруостарынан дьарыктанар биир бөдөҥ уонна кырдьаҕас тэрилтэ. Эһиил институт төрүттэммитэ 140 сылын бэлиэтиэҕэ. Бүгүҥҥү күҥҥэ ВНИРО 28 филиалыгар 6 тыһыынча научнай үлэһиттээх. Институт салайааччыта Саха сирин салалтатын, тустаах министиэристибэлэри кытта кэскиллээх үлэни ыытарга бэлэмин биллэрдэ.
— Кэлиҥҥи сылларга өрөспүүбүлүкэ улуустарыгар өрүстэргэ уонна күөллэргэ балыгы ыытыы үлэтэ былааннаахтык ыытыллар. Ол гынан баран кэккэ боппуруос үөскүүр. Холобура, квота боппуруостара. Маны быһаарыыга биһиэхэ син биир наукаҕа олоҕуран чинчийии наада. Кыра өрүстэри уонна күөллэри үөрэтэргэ бу институт өҥөтүнэн туһаныахпыт. Ону таһынан, биһиги өрүскэ балык араас көрүҥүн ыытыахпытын баҕарабыт. Урукку өттүгэр сүрүннээн быраҥааттаны биир эрэ өрүскэ ыытар буоллахпытына, билигин биэс өрүскэ барытыгар ыытыахпытын баҕарабыт. Чыыр, уомул балыктары ыытарбытыгар наука чинчийбит көрүүтэ наада, — диэн экология, айылҕа уонна ойуур хаһаайыстыбатын миниистирин бастакы солбуйааччы Яков Заровняев «Саха» НКИХ «Сонуннар» биэриилэригэр кэпсээтэ.
Сөбүлэҥ докумуон чэрчитинэн, уу биоресурсаларын саппааһын быһаарыыга саҥа методическай ньымалары чинчийии, искэҕи мунньар пууннары тэрийии, Саха сирин күөллэрин уонна өрүстэригэр ыытыллыахтаах үлэ кээмэйэ быһаарыллыаҕа.
Елена ПОТОЦКАЯ, «Саха сирэ» хаһыат, edersaas.ru
Хаартыска — Мария Васильева, СИА.