Бүгүн Дьокуускайга Комсомольскай болуоссакка «Саха сирин балыга» диэн өрөспүүбүлүкэтээҕи дьаарбаҥка буолан ааста.
edersaas.ru
Улахан тэрээһиҥҥэ Арктика уонна хоту улуустартан 15 тыа хаһаайыстыбатын кэпэрэтииптэрэ, балыгынан дьарыктанар хаһаайыстыбалар кыттыыны ыллылар. Сыстыганнаах дьаҥ кэмигэр доруобуйаны бөҕөргөтөргө балык саамай күндү аһынан буолбута харахха быраҕыллар. Төһө да дьиэттэн тахсыахтарын баҕарбатахтарын да иһин, балык атыылаһыан баҕалаах киһи үгүс.
Былырыыҥҥыга тэҥнээтэххэ, хаһаайыстыбалар ох курдук бэлэмнэммиттэр. Ол ааттарыгар-суолларыгар, нууччалыы эттэххэ, «экипировкаларыгар» да көстөр.
Булуҥ улууһуттан сылдьар «Хоту балык» тэрилтэ салайааччыта Алексей Птицын бэлиэтииринэн, сыл аайы дьаарбаҥканы тэрийээччи Тыа хаһаайыстыбатын министиэристибэтэ бу тэрээһиҥҥэ олус эппиэтинэстээхтик сыһыаннаһар.
— Онуоха эбии күн-дьыл туран биэрдэ. Күннээх, ичигэс күн буолан, атыылаһааччы элбэх. Онон атыыбыт барда, — диэн урбаанньыт санаатын үллэстэр.
«Хоту балык» салалтата атыыласпыт дьонун сып-сылаас сибиэһэй уомул балык миининэн күндүлээн үөртэ.
47 сыл ыстаастаах суоппар Николай Казанин кэргэнин кытта тууһаммыт уонна сибиэһэй балык ылбыттар.
— Сарсын идэлээх бырааһынньыкпын дьиэ кэргэммин кытта бэлиэтиэхпит. Онно сибиэһэй балык ыллыбыт. «Хоту балык» тэрилтэ бородууксуйатын бэркэ суулаан-хаалаан уган атыылыыр эбит.
Киһи эрэ атыылаһыах курдук, ону сөбүлээн биһиги ааһа барбатыбыт. Ол «манньабытыгар» аны босхо уомул миининэн күндүлээтилэр. Ама, маннык тэриммит хаһаайыстыбаттан киһи хайдах атыыласпакка барыай? — диэн санаатын үллэстэр аҕам саастаах суоппар.
Дьаарбаҥкаҕа Кэбээйи сибиэһэй собото эмиэ атыыга хамаҕатык барда. Хата, бу күһүҥҥүттэн сыаналарын ыараппатахтар — 250 солкуобайга атыылаатылар.
Саха ынаҕын этин Нам Таастааҕыттан эмиэ атыылыы тураллар. Уопсайынан, эт атыылааччы да үгүс. Чурапчыттан, Хаҥаластан тыа хаһаайыстыбатын бородууксуйатын атыылаатылар.
Дьаарбаҥка сарсын иккис күнүн үлэлиэҕэ. Сибиэһэй балык сыаната удамыр (1 киилэ): чыыр — 450 солк., уомул — 290 солк., муксуун — 300 солк, ряпушка — 180 солк.
Онон балык арааһын кыһыҥҥыга хаһааныҥ.
Елена ПОТОЦКАЯ, «Cаха сирэ» хаһыат, edersaas.ru
Хаартыскаҕа ааптар түһэриитэ.