Саха уолаттара биригээдэ тэринэн баран, өрөспүүбүлүкэ улуустарын кэрийэ сылдьан олорор дьиэлэри тутан биэрэр буоллулар.
Елена ПОТОЦКАЯ, «Саха сирэ» хаһыат, edersaas.ru
Бу туһунан мин соторутааҕыта Өймөкөөн улууһун Төрүт нэһилиэгэр тиийэ сылдьан истэммин, үлэлэрин анаан көрдүм-иһиттим. Кэбээйиттэн төрүттээх Ян Дьяконов салайар «Дохсун» чааһынай тэрилтэтигэр Горнай, Уус Алдан уонна Кэбээйи уолаттарын түмпүт. Онон, уопсайа алтыа буолан, дьиэни 1,5 ый иһигэр дьэндэттилэр. Дьиэ каркааһынан тутуллар буолан, остуоруйаҕа кэпсэнэрин курдук түргэн эбит. Бэдэрээтчит «Тасстрой» үлэ булан биэрээччи буолан, уолаттары абыраабыт. Ол курдук, былырыын бу биригээдэ Булуҥ улууһугар Быков Мыска икки дьиэни балыксыттарга тутан биэрбит. Уус Алдан Бороҕонугар, Дьааҥы улууһун Токуматыгар эмиэ маннык дьиэлэри балтараа ый иһигэр тутан киллэрбиттэр.
— 2005 сылтан биригээдэ тэринэн тутууга үлэлиибит. Хоту улуустар баһылыктара олохтоохтук ылсан үлэлиир сирдэригэр тутуу тэтимнээхтик барар. Өймөкөөн улууһун баһылыга Михаил Захаров кэпсэтиитинэн, быйыл нэһилиэк аайы маннык дьиэлэр тутулла тураллар. Төрүккэ бу түөрт кыбартыыралаах иккис дьиэ буолар. Биирэ үлэҕэ киирбитэ иккис сыла. Биһиги аҕыйах хонугунан бу үлэбитин олохтоох дьаһалта баһылыгар туттаран баран дьиэлиэхпит, — диэн тутуу биригэдьиирэ Ян Дьяконов кэпсээтэ.
Мин тиийиибэр, уолаттар эбиэттээн баран, хас биирдиилэрэ бэйэлэрин тустаах үлэлэрин оҥоро сылдьаллара. Толору хааччыллыылаах олорор дьиэлэри кылгас бириэмэ иһигэр тутан киллэрии — бэртээхэй хамсааһын эбит.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.