Социальнай ситимҥэ Мэҥэ Хаҥалас Маттатыттан төрүттээх балерина Саяна Егорова улуу балерина Галина Уланова пуондатыттан истипиэндьийэҕэ тиксибитин туһунан тарҕаммыта. Кини Улан-Удэ куоракка ыытыллыбыт аан дойду таһымнаах куонкуруска кыттан дипломант үрдүк аатын ылан кыайан-хотон дойдутугар кэллэ.
Бу туһунан Саяна агата Егор Егоров маннык кэпсээтэ:
— Биһиги Мэҥэ Хаҥалас улууһуттан төрүттээх ыалбыт. Кэргэним Христина Шергина Егорова саха циркэтин артыыската. Билигин бочуоттаах сынньалаҥҥа олорор. Кини Матта нэһилиэгиттэн төрүттээх. Онон хас сайын ахсын оҕолорбут ийэлэрин дойдутугар Маттаҕа сайылыы барааччылар. Матта иккис дойдубут буолан хаалбыт. Дьиҥэ, кыыспыт Саяна 33№-дээх оскуолаҕа бэһис кылааска сырыттаҕына этэ, кыыспытын балетнай оскуолаҕа сүүмэрдээн ылбыттара. Оҕо эрдэҕиттэн үҥкүүгэ дьоҕурдаах буолан, биир кылааһы хаалан да туран, бу балетнай оскуолаҕа көһөн хаалбыта. Биллэн турар, оҕобутугар уйулҕа да өттүнэн үгүс ыарахаттар бааллара. Ардыгар санаата түспүт кэмигэр «Эһиги миигин тоҕо бу балетка биэрбиккитий, таах сибиэ манна кэлэн» дэтэлиир кэмнэрдээҕэ. Ол эрээри балетын хаалларар туһунан тыл көтөхпөтөҕө. Тулуйан дьаныардаахтык дьарыктанарын тохтоппотоҕо. Быйыл Улан-Удэҕэ куонкуруска кытта барарбытыгар Мэҥэ Хаҥалас улууһун культураҕа бырабылыанньата өйөөн, оҕобут айанын, антах тиийэн олорор харчытын барытын уйуммута. Онон улууспутугар махталбыт муҥура суох. Оҕобут бу истипиэндьийэҕэ тиксибитэ кини сыралаах үлэтин ситиһиитэ дии саныыбыт. Кыыспыт сыл ахсын Сочи куоракка «Сириус» диэн лааҕырга тиийэн дьарыктанар. Бу лааҕырга Саянабытын ыҥыран семинарга кыттан астынан кэлбитэ. Быйыл кыыспыт өрөспүүбүлүкэтээҕи Ил Дархан харыйатыгар ыҥырылынна. Оҕобутун харахпытыгар көрөрбүт ахсааннаах. Манна, куоракка интэринээккэ олорор. Колледжын бүтэриэхтээх. Биирдэ эмит оҕобутугар ас астаан илдьэн үөрдэбит.
Саянаҕа салгыы сайдан, төрөөбүт дойдутун ааттата турдун диэн баҕа санаабытын тиэрдэбит.
Ульяна ЗАХАРОВА, edersaas.ru