СӨ бырабыыталыстыбатын бэрэссэдээтэлин солбуйааччы Ольга Балабкина коронавирус инфекциятын киллэриини уонна тарҕатыыны бопсор суһал штаб брифинин ыытта.
edersaas.ru
Кини, бастатан туран, кыраныысса таһыттан уонна РФ эрэгийиэннэриттэн кэлбит дьону кэтээн көрөн бэрэбиэркэлээһин салҕанарын туһунан тоһоҕолоон бэлиэтээтэ.
СӨ үрдүкү былааһын хонтуруолугар салгын, тимир суол эрэ буолбакка, массыына суоллара ылылыннылар. Ольга Валерьевна бэлиэтээн эппитинэн, Саха сиригэр баар инфекциялар тастан аҕалыллыбыттарынан сыаналаналлар.
Коронавируска сыстыбыт Бүлүү улууһун олохтооҕун Дьокуускайга аҕалан иһэллэрин туһунан иһитиннэрдэ. Ыарыһах бу иннинэ Бүлүү улууһун оройуоннааҕы Киин балыыһатын сыстыганнаах ыарыылар отделениеларыгар эмтэммитэ.
СӨ Доруобуйа харыстабылын министиэристибэтэ телемэдиссиинэ көмөтүнэн чинчийиини ыытан баран, бүгүн ыарыһаҕы Дьокуускайга аҕаларга быһаарда. Салгыы миэстэтигэр ыарыһаҕы кытары сөмөлүөккэ, оптуобуска уонна таксига кинини кытары хантаактаспыт дьону кытары үлэ салҕанар. Ону тэҥэ, дьиэ кэргэнин чилиэннэрэ болҕомтоҕо ылылыннылар.
Надежда ЕГОРОВА, “Саха сирэ” хаһыат, edersaas.ru