Муус устар 1 күнүгэр СӨ Бырабыыталыстыбатын бэрэссэдээтэлин солбуйааччы Ольга Балабкина коронавирус дьаҥын киллэрбэт уонна дьаҥ тарҕаныытын утары үлэҕэ видеокэмпириэнсийэ ыытта.
Кини бу күҥҥэ дьаҥҥа сыһыаннаах сонуннары иһитиннэрдэ, өрөспүүбүлүкэҕэ кэлии-барыы туругун туһунан билиһиннэрдэ. Өрөспүүбүлүкэҕэ балаһыанньа өссө даҕаны уустугунан ааҕылларын эттэ итиэннэ олоҕу хааччыйар сулууспалар бары күүстээх режиминэн үлэлииллэрин эттэ.
Брифинг кэмигэр суруналыыстар мэдиссиинэ киинигэр коронавируһу утары үлэлиир быраастарга эбии төлөбүр көрүллэрин туһунан ыйыттылар. Бу ыйытыыларыгар Ольга Валерьевна туспа быһаарыллыа диэн хоруйдаата. Ону таһынан, Аллараа Бэстээх кууһунан атыылыыр тэрилтэлэрэ арыгы атыылыылларын хааччахтааһын туһунан ыйытыы киирбитигэр, бу күннэргэ Мэҥэ Хаҥаласка арыгы атыыта хааччахтанара күүтүллэрин туһунан эттэ.
Егор Карпов, «Саха сирэ» хаһыат.
Хаартыскаҕа Мария Васильева (СИА) түһэриитэ