Хааччахтыыр миэрэлэри хайдах тутуһарбытыттан, эрэгийиэҥҥэ дьаҥ-дьаһах балаһыанньата тутулуктаах.
Өрөспүүбүлүкэ үрдүнэн оҕолор дьаҥнааһыннара улахана суох. Ол да буоллар, биирдиилээн ыалдьыылар тахсалларынан, Ил Дархан өрөспүүбүлүкэ суһал ыстаабыгар уонна Роспотребнадзор управлениетыгар үөрэх тэрилтэлэригэр коронавирус сыстыганнаах дьаҥын тарҕаппат туһуттан, быһыы-майгы кутталланар түгэнигэр, суһал быһаарыыны ылалларыгар сорук туруорда. «Дьаҥнааһын чахчыта баара чопчуланнаҕына, кылааска эбэтэр оҕо саадын бөлөҕөр, харантыын биллэрэр туһунан быһаарыы хас да чаас иһигэр ылыллыахтаах», — диэтэ кини.
Вице-премьер, СӨ суһал ыстаабын салайааччытын солбуйааччы Ольга Балабкина коронавирус сыстыганнаах дьаҥа туруоҕуттан, өрөспүүбүлүкэҕэ ыалдьааччы ахсаана барыта 10 тыһыынчаттан тахсыбытын эттэ. Коронавирус дьаҥар хаптарбыт 10 036 киһиттэн, 6 910 киһитэ Дьокуускайга олороро бэлиэтэммит. Ааспыт биир сууккаҕа өрөспүүбүлүкэ үрдүнэн 100 киһи бу дьаҥҥа сутуллубутуттан, 61 киһитэ Дьокуускай куоракка олорор.
СӨ Роспотребнадзор управлениетын салайар Маргарита Игнатьева Роспотребнадзор управлениета мониторины ыытыыны, хонтуруоллуур-кэтээн көрөр үлэни тэрийиини тиһиктээхтик салгыырын, атыы-тутуу эбийиэктэригэр хааччахтыыр миэрэлэр тутуһуллууларын бэрэбиэркэлээһин ыытылларын бэлиэтээтэ. Кэнники икки күҥҥэ Дьокуускайга 20 атыы-тутуу киинигэр уонна маҕаһыыннарга бэрэбиэркэлэр оҥоһуллубуттар.
Доруобуйа харыстабылын миниистирэ Елена Борисова: «Дьокуускайга уонна хас да улууска куойка миэстэлэр эбии көрүлүннүлэр. Онон өрөспүүбүлүкэ үрдүнэн барыта 2 102 куойка баар буолла. Мантан Дьокуускайга — 1 138. Бу ыам ыйын кытары тэҥнээтэххэ элбэх. Ыам ыйыгар 900-тэн тахса куойка баара», — диэтэ.
Өрөспүүбүлүкэ суһал ыстаабын чилиэнэ, Дьокуускай куорат баһылыга Сардаана Авксентьева куоракка атыы-тутуу эбийиэктэригэр, кафеларга, рестораннарга күн ахсын хааччахтыыр миэрэлэри тутуһууну бэрэбиэркэлээһин, оттон дьон олорор дьиэлэригэр дезинфекция ыытылларын эттэ. Ырыынактарга, оптуобустарга, атыы-тутуу эбийиэктэригэр мааската суох сылдьыылар түгэннэрэ тахсарын, ыстарааптар түһэриллэллэрин иһитиннэрдэ.
Мунньах түмүгэр Айсен Николаев суһал ыстаапка хааччахтааһыннары булгуччу тутуһалларын ирдииллэригэр эттэ. «Өрөспүүбүлүкэ олохтоохторо хааччахтааһын миэрэлэрин, ылыллыбыт санитарнай-эпидемиологическай ирдэбиллэри тутустахтарына эрэ, Дьокуускайга уонна улуустарга хоруона хамсыгын хардыытын тохтотор кыах баарын чуолкайдык, чопчу өйдүөх тустаахтар», — диэн Ил Дархан түмүктээтэ.
СӨ Ил Дархан уонна Бырабыыталыстыба пресс-сулууспата
Андрей Сорокин (СИА) хаартыскаҕа түһэриитэ