Арассыыйа үрдүнэн “Искусственный интеллект и машинное обучение” диэн билсиһиннэрэр уруок ыытыллыахтаах.
edersaas.ru
Уруогу Бүтүн Арассыыйатааҕы “Цифровой урок” үөрэх бырайыагын чэрчитинэн, РФ Сибээс, сыыппара сайдыытыгар уонна Үөрэх министиэристибэлэрэ, «Цифровой экономика» тэрилтэ дойду тутаах цифровой хампаанньаларын кытта бииргэ балаҕан ыйын 14-27 күннэригэр тэрийэн ыытар былааннаахтар.
Сбербаан уонна “Вклад в будушее” аһымал пуонда бииргэ оҥорбут уруоктарын сыала-соруга оҕолору “искуственнай интеллект” диэн өйдөбүлү кытта билиһиннэрии, бу эйгэҕэ сайдыы кэскилин туһунан өйдөтүү буолар. Маҥнайгы кылаастан 11-с кылаас үөрэнээчилэрэ бары бу уруокка онлайн үөрэниэхтэрин сөп, төрөппүттэр уонна учууталлар кыра кылаас оҕолоругар көмөлөһөллөрө күүтүллэр. Кинилэргэ анаан өйдөтөр, быһаарар памяткалар тарҕаныахтара.
РФ сибээс, сыыппара сайдыытыгар миниистирэ Максут Шадаев бу уруок туһунан маннык этэр: “Искусственный интеллект билигин инники сайдыы сүрүн сүүрээнэ. Сотору кэминэн бу технология дьон үгүс дьарыгын бэйэтигэр ылыаҕа, уопсастыба, судаарыстыба уонна урбаан эйгэтигэр өссө таһаарыылаах үлэни, сайдыыны аҕалыаҕа. Ол иһин, бүгүн бу эйгэҕэ үлэлиир программистар хамнастара күнтэн күн үрдүү турар. “Урок цифры” курдук бырайыактары оҕолор дириҥник өйдүүллэригэр аныыллар, саҥа идэни көрдүүргэ көмөлөһөллөр”.
Егор Карпов, «Саха сирэ» хаһыат, edersaas.ru