Балаҕан ыйыгар этэҥҥэ үктэннибит. Ый саҥатыгар олохпутугар-дьаһахпытыгар сыһыаннаах саҥа сокуоннар олоххо киирэллэр. Балаҕан ыйыгар киирбит саҥа сокуоннартан сүрүннэрэ диэбиппитин билиһиннэрэбит.
Чэпчэтиилээх билиэт
Өрөспүүбүлүкэбит Уһук хоту улуустарыгар чэпчэтиилээх билиэти атыылааһын сөргүтүлүннэ. Ил Дархан Айсен Николаев быһаччы сорудаҕынан, итини толуйууга диэн 175 мөл. солк. көрүлүннэ. Итиннэ сыһыаннаах кэккэ уларыйыылар киирдилэр. Ол курдук, тустаах субсидия сыл устата үлэлиир уонна саастарынан хааччахтааһын суох буоллулар. Чэпчэтиилээх билиэт кубуотата эбиллэрэ ситиһилиннэ.
Электроннай докумуону толоруу ыыра кэҥиир
Балаҕан ыйын 1 күнүттэн тимир көлөнөн таһаҕаһы тиэйиигэ-таһыыга аналлаах электроннай докумуон саҥа көрүҥэ олоххо киирдэ. Ол эбэтэр, электроннай ньыманан тимир көлө докумуонуттан саҕалаан нэрээт бирикээһигэр тиийэ барыта электроннай ньыма көмөтүнэн толоруллар буолла. РФ Тырааныспарга министиэристибэтигэр эппиттэринэн, тустаах тэрилтэ эбэтэр биирдиилээн да дьон хайа ньыманы туһанан үлэлииллэрин бэйэлэрэ талаллар, ол гынан баран, сотору аныгы олох ирдэбилинэн булгуччулаахтык олоххо киирэрэ буолуо ээ.
Хамсаабат баай-дуол регистрацията
Мантан инньэ Росреестр дьоҕус иэннээх олорор дьиэни регистрациялааһыны тохтотто. Ирдэбил быһыытынан кыбартыыра, чааһынай дьиэ эмиэ киирэр, иэнэ биир киһиэхэ тиксэр кээмэйиттэн ол эбэтэр 6 кв. м дьоҕус буолуо суохтаах. Ол гынан баран, дьиэни нэһилиэстибэ быһыытынан уонна ийэ хапытаалын үбүнэн ылбыт буоллахха, приватизациялыырга ити саҥа ирдэбил хапсыбат.
Аармыйаттан кимнээх босхолоноллоруй?
Күһүҥҥү сулууспаҕа ыҥырыы биир ыйынан саҕаланыаҕа, ол эбэтэр алтынньы 1 күнүттэн. Бу билигин, балаҕан ыйын устата, IT эйгэтигэр үлэлиир дьонтон аармыйаттан босхолонууга диэн сайабылыанньаны хомуйуу саҕаланна. Онуоха сайабылыанньаны үлэнэн хааччыйааччы Судаарыстыбаннай өҥө порталын көмөтүнэн ыытар. Ону анал хамыыһыйа үчүгэйдик сыныйан, ымпыгар-чымпыгар тиийэ барытын көрөр-истэр уонна аармыйаҕа сулууспалыыртан босхолуур туһунан бигэргэтиини таһаарар.
Психиатрическай көрүүнү-истиини ааһыахпыт
Балаҕан ыйыттан хас биирдии үлэһит психиатрическай көрүүнү ааһыаҕа. Бу — булгуччулаах ирдэбил буолар. РФ Доруобуйаҕа харыстабылын министиэристибэтигэр эппиттэринэн, үлэһит психиатрическай көрүүнү-истиини ааһарыгар үлэнэн хааччыйааччы анал бирикээс таһаарыахтаах.
Судаарыстыбаннай өҥө порталыгар саҥа сервис баар буолла
Бу каадыр докумуонугар сыһыаннаах уларыйыы. Балаҕан ыйын 1 күнүттэн Судаарыстыбаннай өҥө порталыгар үлэнэн хааччыйааччы уонна исписэлиис (үлэһит) тустаах докумуоннары ылсыыларыгар-бэрсиилэригэр аналлаах электроннай сервис саҥа көрүҥэ баар буолла. Ол эрээри, бу өҥөнү туһанары-туһамматы тэрилтэлэр бэйэлэрэ быһаарар бырааптаахтар.
Дааннайдары туһаныыга уларыйыы
«Тус дааннайдар тустарынан» диэн сокуоҥҥа эмиэ уларыйыы киирдэ. Үлэнэн хааччыйааччылар Роскомнадзорга исписэлиистэрин тус дааннайдарын туһаммыттарын уонна туһаналлларын туһунан сибидиэнньэни тиксэрэр буоллулар. Тустаах иһитиннэриилэри Роскомнадзорга электроннай көрүҥүнэн эбэтэр кумааҕынан да ыытыахтарын сөп.
Социальнай көмө
Социальнай көмө быһыытынан ананар саҥа миэрэлэргэ ыспыраапка хомуйуу аны тохтоото. Тустаах тэрилтэ исписэлиистэрэ барытын бэйэлэрэ оҥорор буоллулар. Социальнай төлөбүр сайабалыанньата суох бэриллэр буолла. Бу уларыйыы 2024 сылга диэри үлэлиир. Социальнай хабааннаах төлөбүрдэр уонна босуобуйалар сайабылыанньата суох ааҕыллан, тута каарталарга түһэриллиэхтэрэ.
Хаартыска — интэриниэт ситимиттэн.