“Триумф” Спорка бэлэмнэнии киинигэр маннык элбэх киһи мустубутун өтөрүнэн көрө иликпин. Били нууччалар, “дьаабылыка да түһэр сирэ суох” дииллэригэр дылы, саалаҕа лыык курдук киһи мустубут. Кинилэр, сахаҕа даҕаны хабыр киирсиилээх, хорсун санаалаах уоланнар бааллар эбит ээ диэн сүргэлэрэ көтөҕүллэн, эрэх-турах санаалаах тарҕастылар.
Петр Павлов, «Саха сирэ» хаһыат, www.edersaas.ru
Кырдьык даҕаны, Ил Дархан кубогар аныгы панкратиоҥҥа күрэхтэһии биһиги өрөспүүбүлүкэбитигэр ыытыллыыта – кэрэ бэлиэ түгэн. Күрэхтэһиини СӨ Спорка министиэристибэтэ, Саха сирин уонна Уһук Илиҥҥи федеральнай уокурук аныгы панкратиоҥҥа федерациялара кыайа-хото тутан, үрдүк таһымнаахтык тэрийэн ыыппыттарын бэлиэтиир оруннаах.
Комментаторынан Москваттан биллиилээх спортсмен, киин тэлэбиидэнньийэ ыытааччыта Сергей Бадюк үлэлээбитэ даҕаны, түһүлгэ таһымын үрдэтэн биэрдэ. Ону тэҥэ бочуоттаах ыалдьытынан Хабаровскайтан Уһук Илиҥҥи федеральнай уокурук аныгы панкратиоҥҥа федерциятын бэрэсидьиэнэ Дмитрий Коньков буолла. Күрэхтэһии үөрүүлээхтик аһыыллыытыгар кинилэр уонна Саха Өрөспүүбүлүкэтин Ил Дархана Егор Борисов көрөөччүлэри эҕэрдэлээтилэр итиэннэ спортсменнарга ситиһиини баҕардылар.
Дьэ, ол кэнниттэн октагоҥҥа (аҕыс кырыылаах сиэккэнэн тардыллыбыт анал түһүлгэҕэ) биир-биир киирсиилэр ыытыллан истилэр.
Бу киэһэ саамай күүтүүлээх уонна быһаарыылаах киирсиитинэн – тайскай боксаҕа аан дойду чөмпүйүөнэ Григорий Попов кореец Ким Сунг Чжелыын киирсиитэ буолла. Биһиги бэйэбит уолбут кыайарыгар эрэллээх этибит. Григорий уопуттаах байыас. Ситиһиилэрэ даҕаны баһырхайдар. Аныгы панкратиоҥҥа бу күҥҥэ диэри 10 киирсииттэн – биир эрэ хотторуулаах.
Уолбут бэйэтин дьиэтигэр тэриллэр киирсиигэ ох курдук оҥостон, хайаан даҕаны кыайардыы сананан, этэргэ дылы, сирэйэ-хараҕа туран, сытыытык кииристэ. Манна даҕатан эттэххэ, бу иннинээҕи киирсиилэр бары биэстии мүнүүтэлээх икки түһүмэххэ ыытыллыбыт эбит буоллахтарына, Поповтаах кореец киирсиилэрэ биир раунунан уһуннук ыытылынна. Бастакы түһүмэх бэйэни үөрэтэн, чуҥнаан көрүүнэн саҕаланна. Биһиги боотурбут, боксердар тылларынан эттэххэ, бастакы нүөмэринэн үлэлээтэ. Ол аата, наар кимэ, араастаан охсо, тэбэ сатаата. Иккис түһүмэххэ биир түгэҥҥэ Григорий утарсааччытын ахтатын анныгар күүстээх тэбиини оҥорон, кореец туймааран ылла. Бу улахан ыарыылаах тэбии кэнниттэн, кореец уота-күөһэ умуллан, наар көмүскэнэр эрэ аакка сырытта. Күүстээх охсуулары ылан сирэйэ-хараҕа кыа хаан буолла. Ол да буоллар, секундана киирсиини тохтотор санаата суох, сүбэлээн-амалаан, киһитин киириһиннэрэ сатаата. Биһиги байыаспыт эр санаатын ылан, туох баар маастарыстыбатын барытын көрдөрдө. Ааранан, хаан билик буолбут корееһы аһына санаатым уонна бүтэһиккэ диэри киирсэ сатаабытын хайгыы көрдүм. Бу кыайыытынан Григорий Попов 59 киилэҕэ MFP версиятынан Азия чөмпүйүөнүн аатын ылла.
Быйыл ROAD FC биир мөлүйүөн доллар бириистээх аан дойдутааҕы турниры тэрийэн ыытыаҕа. Маныаха Россияттан ким кыттыан сөптөөҕүн быһаарар, сүүмэрдиир күрэхтэһии чуолаан биһиги Дьокуускайбытыгар сүктэриллибитэ. Ол курдук, 70 киилэҕэ диэри түөрт байыас күөн көрүстэ. Маҥнай Илбис Хаан диэн аатынан биллэр биһиги Герман Березкиммыт Омскайтан кэлбит аныгы панкратиоҥҥа норуоттар икки ардыларынааҕы турнирдар кыайыылаахтара Евгений Лахинныын киирсиитигэр, иккис рауҥҥа тыыны хаайар албаска киирэн биэрэн, хотторуулааҕынан ааҕалынна. Оттон Павел Гардеев (Омскай) уонна Эльнур Агаев (Хабаровскай) киирсиилэригэр судьуйалар биир санаанан быһаарыыларынан, кыайыыны Агаев ситистэ. Бүтэһик киирсиигэ Лахин уонна Агаев көрсүөхтээх этилэр да, Лахин эчэйии ылбытынан, кыайыы Агаевка быһа бэрилиннэ. Онон кулун тутар ыйга Кореяҕа ыытыллар улахан бириистээх турнирга Россия чиэһин Эльнур Агаев көмүскүүр буолла.
Бу киэһэ киирсиилэр бары даҕаны сүрдээх сытыытык бардылар. Ол курдук, 65 киилэҕэ Борис Игнатьев – Степан Громовы, 78 киилэҕэ Мовсар Дохсоев – Алексей Гаврильевы, 94 киилэҕэ Руслан Сивцев – Шерзод Хасановы, 63 киилэҕэ Алексей Пасторов – Сергей Харченконы (Благовещенскай), 65 киилэҕэ Евгений Рязанов (Хабаровскай) – Борис Федоровы, 94-тэн үөһэ кг Петр Егоров – Алексей Левины, 57 киилэҕэ Казимир Захаров – Санни Хатрины (Индия), 62 киилэҕэ Мичил Осипов – Депеш Расалы (Индия) кыайталаатылар.
Петр ПАВЛОВ, “Саха сирэ”, www.edersaas.ru
Ааптар хаартыскаҕа түһэриилэрэ.