Бэс ыйын 12 күнүгэр Дьокуускайтан Бэрдьигэстээххэ «Ночные волки» байкерскай кулууп кэлэн ыалдьыттаата.
Алтыа буолан Бэрдьигэстээх устун Арассыыйа былааҕын туппутунан, тутуу этэрээтин кыргыттарын тэҥҥэ айаннаан киэргэттилэр. Куораттан кэлбит байкердар Кыайыы болуоссатыгар «Сад памяти» норуоттар икки ардыларынааҕы акция чэрчитинэн 10 хатыҥы олортулар. Ону таһынан элбэх оҕолоох соҕотох ийэҕэ Варвара Пестереваҕа бородууктанан көмөлөстүлэр.
Байкердар матасыыкыллара араас таһаалаах, сыаналаах, массыына кэриэтэ чааска 200 килэмиэтиргэ тиийэ түргэтиир эбит. Сайын буолла да Арассыыйа араас куораттарынан, өрөспүүбүлүкэбит иһинэн сырыылара элбэх. Оннооҕор Севастопольга тиийэ 1,5 ыйы быһа айаннаабыттаахтар. Байкердар бэйэлэрэ тус олохторугар араас идэлээх дьон буолан, бу кулууп кинилэри бииргэ түмпүт.
Бэрдьигэстээххэ ыалдьыттары лесхоз үлэһиттэрэ уонна устудьуоннар этэрээттэрэ көрүстүлэр.
Милона Иванова, ХИФУ суруналыыстыкаҕа салаатын устудьуона