Байкалтан Аляскаҕа тиийэ

Бөлөххө киир:

«Байкал-Аляска: Амур экспедициятын суолунан” экспедиция кыттыылаахтара Дьокуускайга кэлэн, суруналыыстары кытары көрүстүлэр. Бу экспедиция өрүстэринэн, муоранан сылдьан, Илин Сибиир, Уһук Илин сирин-уотун чинчийэр, бастакы айанньыттар суолларынан сылдьан, кинилэр хорсун быһыыларын үйэтитэр, ону тэҥэ, туризмы сайыннарар сыаллаах.

Аан бастаан бырайыагы саҕалаабыт Анатолий Казакевич бастакы экспедицияны тэрийэн, 2017-2019 сылларга Иркутскайтан Аляскаҕа тиийэ сылдьыбыттара. Кинилэри Нуучча географическай уопсастыбата, өрөспүүбүлүкэлэр, уобаластар салалталара өйөөбүттэрэ. Анатолий Казакевич этэринэн, 150-200 сыллааҕыта Сибиир атыыһыттара атынан, табанан, уу аалынан 15 тыһыынча килэмиэтири айаннаан, Аляскаҕа тиийэ сылдьаллара. Кинилэр хорсун быһыыларын, дьулуурдарын, тулуурдарын сөҕөн-махтайан, былыргы суолларын батыстыбыт диэн кини кэпсиир. Биллэрин курдук, сырыыларын хаартыскаҕа, видеоҕа түһрээн үйэтиппиттэр. Урукку экспедиция түмүгүнэн документальнай киинэ, кинигэ тахсыбыт.

Быйыл Енисей губернатора, граф Николай Муравьев-Амурскай айанын суолун батыһан, Иркутскайтан Айааҥҥа (Охотскай муораҕа) диэри түһэн баран, Маайа, Алдан өрүстэринэн, Дьокуускайынан эргийэн Байкалга төннөргө быһаарыммыттар. Салгыы Өлүөнэни өксөйөн, Иркутскайга тиийиэхтээхтэр.

Экспедиция кыттыылаахтара маннык историческай сирдэргэ туризмы сайыннарар былааннаахтар, маршруттары, турдары оҥороллор, гостиницалары туталлар. Олохтоохтор көмөлөрүнэн Иркутскайга маннык комплекс тутулла сылдьар. Эрэгийиэннэргэ бииргэ үлэлэһэр партнердары көрдүүллэр. Хас да сиэрийэлээх документальнай киинэ оҥорон таһаарыахтаахтар.

Хоту сир айылҕата кэрэтинэн, баайынан, булдунан-балыгынан эрэ буолбакка, эйэҕэс, аһаҕас, ыалдьытымсах дьонунан биһигини сөхтөрдө. Кинилэр төрөөбүт дойдуларын таптыыллара, киэн тутталлара көстөр. Онон манна туризм сайдыан наада, — диэн Казакевич этэр.

Экспедицияҕа кыттыбыт соҕотох кыыстара Виктория Волкова кииттэри көрбүттэрин, муораҕа буурҕалары, ыарахаттары хайдах туораабыттарын, айанньыт дьахталлары холобур оҥосторун туһунан, о.д.а. кэпсээтэ.

СӨ урбааҥҥа, эргиэҥҥэ, туризмҥа миниистирин солбуйааччы Максим Карбушев бырайыак ураты суоллааҕын, эрэгийиэннэр икки ардыларыгар сибээһи сайыннарарга суолталааҕын бэлиэтээтэ. Министиэристибэ өттүттэн өйүөхпүт диэн эрэннэрдэ.

Ангелина Васильева, “Саха сирэ” хаһыат, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0