Үлэ уонна эйэ бырааһынньыгын көрсө Саха сириттэн ыанньыксыт Владимир Африканович Михайлов РФ Үлэ Дьоруойа буолла. Онон Саха сирин олохтоохторо сэргэх сонуннаах ыам ыйын бастакы күнүн көрсөөрү олоробут.
Түгэнинэн туһанан “Үлэ Албан аата” үһүс истиэпэннээх уордьан кавалера, СӨ тыатын хаһаайыстыбатын үтүөлээх үлэһитэ, РФ уонна Саха сирин тыатын хаһаайыстыбатын бочуоттаах үлэһитэ, “Хотугу сулус уордьаннаах, өрөспүүбүлүкэ рекордсмен ыанньыксыта (наҕараадатын барытын ааҕан сиппэккин), дойдутугар Төхтүргэ сааһыы-сайылыы тахсыбыт Павел Петрович Шарины кытта төлөпүөнүнэн кэпсэтэн, саҥа Үлэ Дьоруойбут туһунан тугу билэрин туоһуластыбыт.
— Владимир Африкановиһы билэн бөҕө. Биһигини пропаганда – хаһыат, араадьыйа, тэлэбиидэнньэ таһаарбыт, куоталаһыннарбыт дьонобут. Хас сарсыарда аайы араадьыйаҕа Байбал Шарин төһө үүтү ыабытын, Владимир Африканович төһөнү ыабытын истибитинэн Саха дьоно оронноруттан турар кэмнэрэ баара. Киниэхэ тиийэ сылдьыбытым, кини миэхэ кэлэн хотоммун көрбүтэ. Миэхэ ынахтарбар ымсыырар этэ. Эрийэн эҕэрдэлээри гынабын, Болуодьам Москваҕа сылдьар быһыылаах, тоҕо эрэ төлөпүөнүн ылбат. Мин кинини 80-с сыллартан билэбин. Иккиэн куоталаһан, илин-кэлин түсүһүү бөҕө буоллахпыт, оччотооҕу күүрээннээх кэмнэргэ. Онон куоталаһыы таһаарбыт дьоруойа диэн этэбин. Дьокуускайга мунньахха кэллэхпитинэ көрсөн кэпсэтээччибит. Наар хотоммут туһунан. Владимир Африканович кэлин Кириэстээххэ көһөн кэлэн, олус таһаарыылаахтык үлэлии сылдьар. Алтаай ынахтарын ыыбын диэбиттээҕэ. Дьокуускайга 65 сааһын туолар үбүлүөйүгэр ыҥырбыта. Киһи быһыытынан олус элэккэй бөҕө. Кэнники кэргэннэммитэ, хата, ыал буолла диэн олус үөрбүтүм. Оҕото оскуолаҕа киирдэҕэ буолуо. “Дьэ, Болуодьаа, өссө 20-чэ сыл үлэлиэххин, оҕоҕун атаҕар туруоруоххун наада”, — диэн күлбүтүм. Кириэстээхтэрэ маладьыастар, дьиэ-уот тутан биэрбит сурахтаахтара.
Ыанньыксыт үлэтэ диэн олус ыарахан үлэ, киһи барыта ыанньыксыт буолан төрөөбөт, үлэлээбэт. Мин, холобур, 30 сааспар биир ынахтан 6072 киилэ үүтү ыан, рекорд олохтообутум. 45 сыл тыа хаһаайыстыбатыгар эҥкилэ суох үлэлээтим. Ыанньыксыттан саҕалаан, салайар да үлэҕэ тиийэ. Биирдэ ВДНХ-ҕа сырыттахпытына, оччолорго Үп министиэристибэтигэр үлэлиир эдэр уол тахсан: “Биһиги Байбал Шариммыт ыабыт үүтүн саҕаны биэрэр ынахтар ити быыстапкаҕа суохтар эбит”, — диэбитигэр, бииргэ сылдьар дьонум: “Оттон Шариныҥ бу турар”, — диэн уолу соһутан тураллар. Үп үлэһитэ сыыппаранан, ахсаанынан суоттаан көрбүтэ чахчы. Кэпсээнтэн кэпсээн, үлэһит киһини дьон билэр, сыаналыыр. Биирдэ Ньурбаҕа сырыттахпына: “Тыыннаах Шариҥҥын дуо?”, — диэн күллэрэн тураллар. Эбэтэр элбэх оҕолоох кырдьаҕас эмээхсин анаан-минээн Шарины көрө баран иһэбин диирин билигин даҕаны астына саныыбын.
Африканович олох үлэһит киһи буолан, баччааҥҥа диэри илиитин араарбакка үлэлии сылдьар. Ыанньыксыкка сирэ-уота, айылҕата барыта көмөлөһөр курдук буолааччы.
Түгэнинэн туһанан хомсомуол доҕорбун РФ Үлэ Дьоруойа буолбутунан эҕэрдэлиибин! Сахам сирин олохтоохторун барыгытын Үлэ бырааһынньыгын өрө көтөҕүллүүлээхтик көрсөргүтүгэр, үлэни өрө тутаргытыгар баҕарабын!
Бэлэмнээтэ Женни Стрюкова
Хаартыскаҕа: П.Шарин, М.Готовцев, В.Михайлов. СӨ Тыа хаһаайыстыбатын министиэристибэтин пресс-сулууспатын тиксэриитэ