Уопсастыба

«Байанай» сурунаал саҥарар, хамныыр халандаара — Саҥа сылга бэртээхэй бэлэх!

Булчуттарга уонна балыксыттарга аналлаах “Байанай” сурунаал эрэдээксийэтэ саха булчут ыттарын, Саха сирин кыылларын, көтөрдөрүн, балыктарын тустарынан кэпсиир-билиһиннэрэр уонна талааннаах худуоһунньук Андрей Чикачев уруһуйдарынан таҥан оҥорбут 2018 сыл халандаардарын атыыга таһаарда.

edersaas.ru


Кэрэхсэбиллээҕэ диэн, хас биирдии халандаар штрих-кодтаах, ол эбэтэр сыһыарыыны смартфонунан хачайдаан, ханнык көтөр дуу, кыыл дуу хайдах саҥарарын истиэххэ, туох олохтооҕун киинэҕэ көрөн билиэххэ сөп. Оннооҕор балыктар кытта “саҥараллар” эбит. “Илгэ” издательскай дьиэ дириэктэрэ, сурунаалы тэрийэн таһаарааччы Юрий Борисов этэринэн, халандаар видео-киинэлэрэ кэмиттэн кэмигэр уларытыллан иһиэхтэрэ. Онон халандаар дьиэ эркинигэр хам хатанан эрэ турбакка, күн-дьыл хаамыытын көрдөрөрүн таһынан элбэх кэпсээннээх, хамсыыр хартыыналаах ыйытынньык суолталааҕын чорботон бэлиэтиибин. Айылҕаҕа чугас, булт куттаах саха дьонугар Саҥа сылга оҕотуттан оҕонньоругар тиийэ дьоһуннаах, бэртээхэй бэлэх буолсу.

Халандаардары кинигэ уонна булт маҕаһыыннарыттан, хаһыат-сурунаал киоскаларыттан булуохха сөп. Олор араастаан сыаналыыллар быһыылаах. Сурунаал бэйэтин эрэдээксийэтигэр ыттаах уонна кыыллаах-көтөрдөөх халандаардары 1-дии мөһөөххө, кууһунан 85-тии солкуобайга, оттон А.Чикачев уруһуйдарынан таҥыллыбыт халандаары биирдиилээн 3,5, кууһунан 3 мөһөөххө атыылыыллар эбит.

Василий НИКИФОРОВ, «Саха сирэ» хаһыат, edersaas.ru

0
0
Telegram @edersaas20

Добавить комментарий