Баай барыылаах Байанай ыйыгар, сэтинньи 27 күнүгэр, балыксыттарга уонна булду сэҥээрээччилэргэ, куорат олохтоохторугар уонна ыалдьыттарыгар анаан “Байанай алгыһа” ыытылынна.
Уокуруктааҕы норуот айымньытын киинин уонна “Арчы дьиэтэ” духуобунай култуура киинин тэрээһиннэригэр ыалдьыттары Байанай алгыһын сиэринэн-туомунан көрүстүлэр. А.Д.Макарова аатынан Саха сиринээҕи култуура уонна искусство кэллиэһин “Эйгэ” сиэр-туом норуодунай тыйаатыра үһүйээҥҥэ олоҕурбут “Байанай кыыһын көрсүбүт” инсценировканы туруорда.
Илгэ» издательскай дьиэ генеральнай дириэктэрэ Юрий Борисов эҕэрдэ тылын тириэртэ. Кини уонтан тахса сыл “Арчы дьиэтин” кытары үлэлэһэн, Байанай киэһэлэрин ыытта.
Арчы дьиэтин исписэлииһэ Алексей Николаев собону көмүлүөк оһоххо үөлэн буһарыыга маастар-кылааһы көрдөрдө. Ыалдьыттар тута үөлүллүбүт собону уонна сибиэһэйдии буһарыллыбыт собо миинин иһэн махталларын биллэрдилэр.
“Байанай алгыһа” тэрээһин, кырдьык да, баай ис хоһооннооҕунан ыалдьыттары астыннарда. Ким да таах олорбокко, көмүлүөк оһох сыралҕаныгар бигэтэн, балык миинин амсайдылар, тэрээһиҥҥэ көхтөөхтүк кытыннылар.
РФ норуот эмчиттэрин конфедерациятын чилиэнэ, «Сандаар» норуот эмчиттэрин уопсастыбаннай түмсүүтүн чилиэнэ, сорсуннаах булчут Ирина Петрова эдэр сылдьан бултаабыт мүччүргэннээх сырыыларыттан кэпсээн сөхтөрдө. Ирина Кузьминична бөрө, таба тириититтэн тикпит булка кэтэр таҥаһы дьоҥҥо көрдөрдө.
Саанан ытыыга өрөспүүбүлүкэ хас да төгүллээх муҥутуур чөмпүйүөнэ, спорт маастара, норуот эмчитэ Екатерина Сунхалырова-Байаана сыал ытыытыгар судьуйалаата, үс миэстэлээх балаакканы бириискэ туруорда. Ону сэргэ сааны ыһыыга-хомуйууга тургутук ыытылынна.
Аатырбыт хайыһардьыт, олоҥхоһут, оһуохайдьыт Семен Черноградскай сорсуннах булчут Хочо Маайа туһунан, кыраайы үөрэтээччи, норуот талааннааҕа, суруйааччы Николай Аржаков—Боло Уус былыргы саха ох саа оҥоһуутун туһунан кэпсээннэр, эдэр дьон билбэтэхтэрин биллилэр. Иистэнньэҥнэр булчут таҥаһын, үтүлүгү, кээнчэни тигэн көрдөрүүлэрэ аныгы дьоҥҥо туһалаах буолла.
Бу күн ыалдьыттар үксүлэрэ Баай Байанайтан бэлэҕиттэн бэриһиннэрэн, дьиэлэригэр өттүк харалаах, илии тутуурдаах төнүннүлэр. Биир ыалдьыт «Сонор» оонньууга кыттан, куобах бирииһи тутан үөрдэ-көттө. Булт-алт тиэмэтигэр ыйытыыларга кэрэ аҥаардар кыайа-хото эппиэттээн соһуттулар, бириистэри ылан Баай Байанайга махтанан тарҕастылар.
“Байанай алгыһа” истиҥ-иһирэх киэһэни “Арчы дьиэтин” исписэлииһэ, алгысчыт Борис Михайлов-Айылҕан иилээн-саҕалаан ыытта.
Надежда ЕГОРОВА, “Саха сирэ” хаһыат, edersaas.ru