Сахабыт сирин үгүс элбэх нэһилиэктэрин ортотугар ураты историялаах, кэрэхсэбиллээх көстүүлээх нэһилиэктэр элбэхтэр. Биир оннук нэһилиэгинэн Уус Алдан улууһун 1 Байаҕантай нэһилиэгэ буолар.
Нэһилиэк дьоно харыстаан илдьэ сылдьар ураты архитектурнай тутуулара Танда сэлиэнньэтин ураты тупсаҕай, историческай көрүҥнүүллэр. Бу күннэргэ улуу Туймаада хочотугар дьоллоох Дьокуускай куорат култуурунай, спортивнай кииннэригэр Байаҕантай күннэрэ ыытылыннылар. Дьаһаллар бэрт тэрээһиннээхтик, элбэх киһи кыттыылаах бардылар. Ол курдук, номоххо киирбит Хабырылла Дьөгүөрэп төрөөбүт күнүгэр Тутуу ырыынагын быыстапкалыыр саалатыгар “Тандалар Дьоруойдарынан киэн тутталлар” диэн Танда мусуойа туруорбут быыстапкаларын көрүү уонна дьоруойдар аймахтарын кытта иһирэх көрсүһүүлэр буоллулар.
Манна БАМ тутуутун бэтэрээнэ Владимир Каркавин уонна Вера Самсонова салалталарынан Владимир Лонгинов аймахтара, Ольга Румянцева, Гаврил Егоров аймахтара кыттыыны ыллылар. Кинилэр олус истиҥ ахтыылары оҥордулар. 90 сааһыгар чугаһаабыт ытык кырдьаҕас Мария Абрамова элбэх историческай чахчылардаах, дириҥ ис хоһоонноох ахтыыта истээччилэр болҕомтолорун тарта. Бу көрсүһүүгэ өрөспүүбүлүкэ икки улахан мусуойун дириэктэрдэрэ Егор Шишигин уонна Ася Габышева, мусуой исписэлиистэрэ, ДОСААФ уопсастыбатын мусуойа кытыннылар. Кинилэр биир идэлээхтэрин, Танда мусуойун үлэһиттэрин кытары уопсай бырайыактарга ситиһиилээхтик үлэлииллэрин кэпсээтилэр. Мусуой аныгы технологияларга тустаах исписэлиистэри кытары хайдах үлэлиирин архитектура кандидата Айталина Старостина сырдатта. Кини салайар айар бөлөҕө Танда кэрэ тутууларын 3D оҥорон саҕалаата.
Истиҥ көрсүһүүнү былыргы Байаҕантай улууһунан тандалары кытары ыкса сибээһи тутар, Байаҕантай тумус туттар дьоно: СӨ Киин быыбардыыр хамыыһыйатын солбуйааччы бэрэссэдээтэлэ Иван Андросов, саха норуотун тарбахха баттанар талааннаах артыыһа Ефим Степанов кэпсээннэрэ дириҥ ис хоһоонноотулар.
Бу күн салгыы инникитин туох үлэ ыытыллыахтааҕын туһунан дьүүллэстилэр, история чахчыларын тула сэһэргэстилэр. Дьон-сэргэ сүргэтин көтөҕөр ыллам ырыалар ылланнылар.
Ефросинья КОЛОДЕЗНИКОВА,
“Саха сирэ”, edersaas.ru сайтка анаан.