Байаҕантайдар күннэригэр дьоруойдар сыдьааннара кэлиэхтэрэ

Кулун тутар 25-29 күннэригэр Дьокуускайга “Үс Дьоруойдаах Байаҕантай нэһилиэгин күннэрэ” ыытыллаллар.

edersaas.ru

Күннэр чэрчилэринэн Дьокуускай куораттааҕы Тутуу ырыынагын быыстапкалыыр саалатыгар “Танда – талааннаахтар түөлбэлэрэ” нэһилиэк уонна Дьокуускайга олорор биир дойдулаахтар кыттыылаах талба талааннаахтар, уран уустар үлэлэрэ көрдөрүүгэ туруорулуннулар.
Кулун тутар 26 күнүгэр “Танда – айар куттаахтар биһиктэрэ” айар талааннаахтары кытары көрсүһүү, кинигэлэр быыстапкалара, саҥа кинигэлэр сүрэхтэниилэрэ буолла. Ону сэргэ “Оо, спорт! Эн – үрдүк өрөгөйгүн!” диэн Байаҕантай нэһилиэгин спортка ситиһиилэрин быыстапката уонна бастыҥ спортсменнары кытары көрсүһүү тэрилиннэ.
Кулун тутар 27 күнэ наука, үөрэх-билии кыһаларыгар уонна эдэр ычат түмсүүтүгэр, сопхуос бэтэрээннэригэр, тыа сирин үлэһит дьонугар ананыаҕа. Ол курдук, 11.00 ч. “Танда – үөрэх, билии сайдар сирэ” көрсүһүүлэр ХИФУ Арктическай инновационнай киинин кэмпириэнсийэлиир саалатыгар тэриллиэхтэрэ. Манна Дьокуускайга үөрэнэр үрдүк уонна орто анал үөрэх кыһаларын устудьуоннарын кытары көрсүһүөхтэрэ. Бу күн 15.00 ч. РСФСР, Саха АССР наукаларын үтүөлээх деятелэ, биологическай наука доктора, профессор А.Д.Егоров 120 сылынан РНА СС Саха сиринээҕи научнай киинин дьиэтигэр мемориальнай дуоскаҕа сибэкки ууруохтара. СӨ Тыа хаһаайыстыбатын министиэристибэтигэр Арассыыйа Үлэҕэ Дьоруойа Михаил Готовцев ыалдьыттыаҕа. 16.00 ч. “Дьоруой Егоров сопхуоһум – килбиэннээх үлэм үтүө кэмнэрэ” диэн дьаһалга араас сылларга сопхуоска бииргэ үлэлээбит үөлээннээхтэр мустуохтара. 17.00 ч. “Модун” спорт киинигэр Байаҕантай нэһилиэгэр уонна Дьокуускай куоракка олорор биир дойдулаахтар икки ардыларыгар спорт биэс көрүҥэр күүстэрин холонуохтара.

Кулун тутар 28 күнүгэр, Байаҕантай нэһилиэгин Албан ааттаах Дьоруойдарын күнүгэр, сарсыарда 10.30 ч. Тутуу ырыынагар гражданскай сэрии дьоруойа Гаврил Егоров төрөөбүтэ — 140, Сэбиэскэй Сойуус Дьоруойа Владимир Лонгинов төрөөбүтэ 100 сылларыгар уонна Арассыыйа Үлэҕэ Дьоруойа Михаил Готовцевка аналлаах быыстапка аһыллыаҕа. 13.00 ч. “Дьоруойдарбыт ааттара – көлүөнэлэри ситимниир” тэрээһиҥҥэ Гаврил Егоров уонна Владимир Лонгинов аймахтарын, чугас дьоннорун кытары көрсөн, история саҥа страницалара арыллыахтара. 16.00 ч. Дьокуускай куораттааҕы уокуругун, Уус Алдан улууһун дьаһалтатын уонна Дьокуускай куорат Сайсары уокуругун, Байаҕантай нэһилиэгин дьаһалталарын икки ардыларыгар Сөбүлэһиигэ илии баттаһыы буолуоҕа.
Кулун тутар 29 күнүгэр 17.00 ч. Оҕо искусствотын оскуолатыгар “Хорсун-хоһуун Дьоруой дьонноох – Тандам миэнэ, айхаллан!” дьоруойдар сылларыгар аналлаах нэһилиэк уонна биир дойдулаахтар кыттыылаах кэнсиэр тэрээһиннэри түмүктүөҕэ. 2019 сыллааҕы үбүлүөйдээх тэрээһиннэргэ өйөбүл аахсыйа тэриллиэҕэ.

Надежда ЕГОРОВА, “Саха сирэ”, edersaas.ru