Култуура

Байаҕантай төрөөбүт күнүгэр саҥа хомуурунньук сүрэхтэниэҕэ

Балаҕан ыйын 26 күнүгэр сарсыарда 9.30 чаастан СӨ Национальнай бибилэтиэкэтин Историческай саалатыгар бэйиэт, суруйааччы, СӨ суруйааччыларын сойууһун чилиэнэ,  тиэхиньиичэскэй наука доктора, РНА Сибиирдээҕи салаатын үтүөлээх бэтэрээнэ Егор Гаврильевич Старостин-Байаҕантай хоһооннорун уонна кэпсээннэрин хомуурунньуга сүрэхтэниэҕэ.

Бу хомуурунньук биир дьикти уратылаах. Ол Брайл систиэмэтинэн сахалыы тылынан бэчээттэммитэ буолар. Кинигэ сүрэхтэниитигэр Байаҕантай тылларыгар, мелодистка Марианна Макарова бэйэтин мелодиятыгар ырыалары толоруоҕа, үс саҥа ырыатын билиһиннэриэҕэ.

Байаҕантай доҕотторун, үрдүк үөрэх кыһатыгар бииргэ үөрэммиттэри, чугас дьонун, бэйиэттэри, суруйааччылары, кини поэзиятыгар сүгүрүйээччилэри  төрөөбүт күнүгэр ыытыллар литература кэрэхсэбиллээх тэрээһинигэр ыҥыраллар.

ххх

Хомуурунньук ааптара, үөрэххэ ураты наадыйар устудьуоннар, аспираннар уонна исписэлиистэр өрөспүүбүлүкэтээҕи ассоциацияларын бэрэссэдээтэлэ, педагогика наукатын хандьыдаата, ХИФУ инклюзивнай үөрэхтээһин сайдыытыгар Хотугулуу-Илиҥҥи научнай-инновационнай киин дириэктэрэ Пантелеймон Романович Егоров хомуурунньук аан тылыгар суруйуута:
“1971 сыллаахха устудьуоннуур сылларбар дьылҕам миигин  Егор Гаврильевич Старостины кытары көрүһүннэрбитэ. Мин Саха судаарыстыбаннай университетын  физика-математика факультетын математика отделениетыгар, онтон Егор Гаврильевич (мин кинини Байаҕантай диэн ааттыырбын олус астынара) СГУ физика-математика факультетын физика отделениетыгар үөрэнэрбит.

Егор Гаврильевич Старостин-Байаҕантай поэзиятын мин бөлүһүөктүү-романтикалаах, таптал лиирикэтинэн сыаналыам этэ. Кини дьиҥнээх саха булчутун курдук, бэйэтин хоһоонноругар дойдутугар, төрөөбүт кыраайын айылҕатыгар уол оҕо тапталын биллэрэр. Байаҕантай хас саас уонна күһүн ахсын  айылҕаҕа талаһара, бултуу уонна балыктыы барара. “Дьиҥнээх бэйиэт – Таҥара таптаабыт киһитэ” диэн мээнэҕэ эппэттэр.

Айар үлэтигэр наадалаах тыллары уонна рифмалары булуу эрэйин-муҥун  туһунан, буолуохтааҕын курдук,  бэйэтин хоһоонноругар кылгастык уонна чопчутук хоһуйар.

Мин кини айар маастарыстыбатын чыпчаалынан дьоппуон поэзиятыгар – хоккуга ылсыбытын бэлиэтиэм этэ. Байаҕантай эмиэ сахалыы хоккуну суруйара, онно кини аҕыйах тылынан, ол эрэн киэҥ киэлилээхтик бэйэтин олоҕун суолтатын бэлиэтиирэ, ити кини бэйиэт талааннааҕын бигэргэтэр.

Байаҕантай поэзията муҥурун булларбат, уйаара-кэйээрэ биллибэт. Онон, мин бэйиэт Егор Гаврильевич Старостин талаанын толору киэбинэн  уонна үтүөкэнник  арыйар учуонай филолог-чинчийээччилэр көстүөхтэригэр эрэнэбин”.

Надежда ЕГОРОВА, «Саха сирэ» хаһыат, edersaas.ru

1
0
Telegram @edersaas20