Маны аах Тыа хаһаайыстыбата

Байаҕантай нэһилиэгэ 829 туонна оттоох

«Сайыҥҥы биир күн кыһыны аһатар» диэн сөпкө этиллэр, саха ыала үс ый иһигэр кыстык отун-маһын бэринэр.

edersaas.ru

Бу ааһан эрэр сайын элбэх күүтүллүбэтэх тургутууну оҥордо – уот кураан түстэ, аһыыҥка ыһан кэбистэ. Эбиитин баһаар бөҕөтө туран, буруонан тунуйан, оттооһуҥҥа улахан харгыстары таһаарбыта. Тыа дьоно барахсан маны барытын тулуйан, иитэр сүөһүлэрин-сылгыларын аҕыйаппат туһугар туруулаһан үлэлии-хамсыы сылдьаллар.
Томпо улууһун Байаҕантай нэһилиэгин дьаһалтатын тыа хаһаайыстыбатыгар исписэлииһэ Раиса Степанова маннык кэпсиир:

Биһиги нэһилиэкпит уопсайа 3286 туонна оту оттуур былааннааҕыттан бүгүҥҥү туругунан 829 туонна оттоннубут, ол эбэтэр, сыл тахсар оппут 25 %-а эрэ баар. Барыта 14 бааһынай хаһаайыстыбалаахпыт, кинилэр 429 туоннаны оттоотулар (былааннара 2 143 туонна), оттон кэтэх ыаллар 400 туоннаны чөкөттүлэр (былааннара 1143 туонна). Дьон билигин да оттуу сылдьаллар, онон күн-дьыл туран биэрдэҕинэ, мантан күһүн 450 туоннаны эбэн, барыта холбоон 1129 туонна оттонуохпут, былаан 35 %-а буолуон сөп диэн сабаҕалыыбыт.

Нэһилиэк үрдүнэн 2016 ынах сүөһүлэхпит уонна 1045 сылгылаахпыт. Быйыл сайын кураан тэбиитигэр ыксаллаах быһыы-майгы биллэриллибитэ. Сүөһүнү эспэт соруктан, оту атыылаһыыга Магадан уонна Амур уобалаһын кытары дуогабар түһэрсибиппит. Ол оту аҕаларга өрөспүүбүлүкэ салалтата, оттон эбии аһылыка анаан эбиэһи уонна комбикуорманы аҕалыыга улууспут дьаһалтата көмө көрөллөрө. Билиҥҥи туругунан оту атыылаһарга сайаапка 10 бааһынай хаһаайыстыбаттан итиэннэ 104 кэтэх ыалтан киирдэ.

Томпоттон Ирина Харайданова, «Саха сирэ» edersaas.ru сайтка анаан

Хаартыскаҕа Баланова Варвара Романовна түһэриитэ

0
0