«BAIQONYR ISFF» киинэ бэстибээлин сүрүн бириистэрин саха киинэлэрэ ыллылар

BAIQONYR International Short Film Festival норуоттар икки ардыларынааҕы киинэ бэстибээлигэр кылгас метрдаах киинэлэр күрэстэригэр сүрүн бириистэри «Река» уонна «Айтал» диэн саха киинэлэрэ ыллылар.

Бэстибээл саайтыгар түмүгү таһаарбыттар. Кылгас метрдаах киинэ куонкуруһугар барыта 16 киинэни көрбүттэр. Номинацияларынан бастыҥнары талбыттар:

Гран-при – «Река» (Дмитрий Давыдов, Саха сирэ);

Бастыҥ режиссура – «Река» (Дмитрий Давыдов, Саха сирэ);

Оператор бастыҥ үлэтэ – «Айтал» (Алексей Павлов, Саха сирэ);

Бастыҥ сценарий – «Айтал» (Михаил Башкиров, Владимир Мункуев, Саха сирэ);

Эр киһи бастыҥ оруола – «Река» (Радислав Захаров, Саха сирэ).

Дьүүллүүр сүбэ быһаарыытынан, дьахтар бастыҥ оруолун быйыл талбатахтар.

«Саха киинэтэ сайдан, кылгас метрдаах киинэҕэ үлэлэр баар буолан иһэллэрин бэлиэтии көрдүм. Кыра бүддьүөтү туһанан күүстээх киинэни оҥороллорун сөхтүм, продюсер Сардаана Саввинаны билэбин. Сахалар Арассыыйаҕа киинэни оҥорууга бастыҥнар кэккэлэригэр сылдьаллар«, — диэн дьүүллүүр сүбэ бэрэссэдээтэлэ Адильхан Ержанов санаатын үллэстэр.

edersaas.ru