Коронавирус дьаҥын бохсууга балаһыанньа Дьокуускайга эрэ уустук буолбатах. Билигин хааччахтыыр миэрэлэри тутуһарга, куойка ахсаанын элбэтэргэ, лаборатория чинчийиитин түргэтитэргэ, нэһилиэнньэни вакциналыырга үлэ барар. Маннык соруктары бүгүн, алтынньы 20 күнүгэр, Ил Дархан Айсен Николаев оройуон баһылыктарын кытта мунньаҕар туруорда.
Ааспыт сууккаҕа Саха сирин үрдүнэн 133 киһи коронавируска сутуллубута биллибитэ. Маны кытта ыарахан туруктаах ыарыһах ахсаана элбээбит — реанимацияҕа 84 киһи сытар, онтон 24-э ИВЛ-аппараакка холбоммут.
«Бары оройуоннарга эбии куойкалар, ол иһигэр реанимационнайдар эмиэ көрүлүннүлэр. Бүгүҥҥү күҥҥэ Саха сиригэр коронавируһунан ыалдьыбыттарга анаан 2 518 куойка баар, бу быйыл сааскыттан 1,5 төгүл элбэх. Бүтэһик нэдиэлэҕэ ПЦР ньыманан тести ааһыы түргэтээтэ. Бу дойду үрдүнэн үрдүк көрдөрүү буолар», — диэн Ил Дархан иһитиннэрдэ.
Ил Дархан оройуон баһылыктарын дакылааттарын иһиттэ, балаһыанньаны кыта билистэ уонна саҥа сорудахтары биэрдэ. Баһылыктар куойка ахсаанын, аптекаларга уонна балыыһаларга эпм-том тиийиниитин хонтуруоллуулларыгар эттэ. Айсен Сергеевич бэлиэтииринэн, олохтоохтор эмп тиийбэтиттэн уонна эмп сыаната үрдүгүттэн дьиксинэллэр.
Саха сирин олохтоохторо ПЦР ньыманан ылар анаалыс түмүгүн болдьоҕо уһунун үҥсэргииллэрин Айсен Николаев эттэ. Билигин бу балаһыанньа Дьокуускайга арыый бигэтийбит эбит буоллаҕына, оройуоннарга уонна киин куорат сорох тэрилтэлэригэр уруккутунан хаалбыт.
Ил Дархан хааччахтыыр миэрэлэри тутуһууну күүһүрдүү үтүө өрүтэ көстүбүтүн бэлиэтиир, ол эрээри үгүс тэрилтэлэр уонна олохтоохтор өттүлэриттэн кэһии баарын этэр. Айсен Николаев үлэһиттэри тэйиччиттэн үлэҕэ көһөрүү салҕанарын, 65-тэриттэн үөһэ саастаах уонна дьарҕа ыарыылаах дьон үлэлии кэлэллэрэ бобулларын туһунан санатта. Кини этэринэн, бу хааччахтары тутуспакка ыарыыга сутуллуу, киһи тыына быстыбыт түгэннэрэ бааллар, бэрэбиэркэ бара турар.
Айсен Сергеевич баһылыктарга нэһилиэнньэҕэ кириип уонна ОРВИ дьаҥын утары вакцинация үлэтэ ыытылларыттан махтанна уонна Саха сиригэр сотору быһыы иккис баартыйата кэлэрин иһитиннэрдэ. Кэлбит вакцина 99 %-на туттуллубут, Саха сирин олохтоохторун 43 %-на быһыыны ылбыт, былаан 72,3 % туолбут.
Ил Дархан уонна бырабыыталыстыба пресс-сулууспата.
Андрей Сорокин хаартыскалара, СИА.