Баһылыктар сүрүн министиэристибэлэр, биэдэмистибэлэр салайааччыларын көрсөн, интэриэһиргиир ыйытыыларыгар толору хоруйу ыллылар
Олохтоох дьаһалталар баһылыктарын семинардара тохсунньу 18 күнүгэр А.Е.Кулаковскай аатынан Норуоттар доҕордоһууларын дьиэтигэр министиэристибэлэр уонна биэдэмистибэлэр салайааччыларын кытары көрсүһүүттэн саҕаланна.
Семинары Саха өрөспүүбүлүкэтин Бэрэссэдээтэлин бастакы солбуйааччы Алексей Колодезников салайан ыытта. Сүрүн иһитиннэриилэри министиэристибэлэр, биэдэмистибэлэр салайааччылара оҥордулар, ыйытыыларга хоруйдаатылар. Саха өрөспүүбүлүкэтин Бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев тыа хаһаайыстыбатыгар былырыыҥҥы сыл устата ыытыллыбыт үлэ-хамнас туһунан кэпсээтэ, кэлэр сыл соруктарын билиһиннэрдэ. Бу салааҕа барыта дьэҥкэ буоллаҕа дуу, баһылыктар биир да ыйытыыны биэрбэтилэр, тугу да эппэтилэр. Ол оннугар дьарыктаах буолуу, ОДьКХ, суол-иис уонна тырааныспар, үп-экономика өттүгэр син балачча ыйыталастылар, этиилэри да киллэрдилэр.
Быйылгы сыл өрөспүүбүлүкэҕэ Дьарыктаах буолуу сылынан биллэриллибитэ. Итинэн сибээстээн киэҥ иһитиннэриини оҥорбут Дьарыктаах буолуу госкэмититэтин бэрэссэдээтэлин солбуйааччы Гаврил Харлампьевка элбэх ыйытыы бэрилиннэ. Баһылыктар кылгас болдьохтоох куурустары элбэхтик тэрийэр наадатын бэлиэтээтилэр, промышленнай хампаанньалар, холобур, ”АЛРОСА” үлэҕэ киирэргэ бэриллэр сайабылыанньаны олус уһуннук көрөллөрүн итиэннэ бэйэтэ биитэр аймаҕа сууттаммыт дьону үлэҕэ ылбаттарын сыыһанан аахтылар. Өлүөхүмэ куоратын баһылыга Альбина Масина өрөспүүбүлүкэ сиригэр-уотугар кэлэн үлэлиир промышленнай тэрилтэлэр олохтоох дьону үлэлэтэргэ интэриэстэрэ суоҕун бэлиэтээн туран, бу хампаанньалар олохтоохтору үлэҕэ ылалларыгар кубуота олохтуурга эттэ.
ОДьКХ уонна энергетика эйгэтигэр электроуотунан сылытыыга киирбит нэһилиэктэргэ ситим эргэтэ, уот кыамтата намыһаҕа элбэх уустуктары үөскэтэрин, бэйдиэ сылдьар ыттары өлөрүү, сыбаалканы уматыы бобуллубута табыгаһа суоҕун бэлиэтээтилэр. Олорор дьиэлэри киин ититэр ситимҥэ холбуурга үлэлэһэр нэһилиэктэр баһылыктара быйылгы сылга саҥа хочуолунайы тутуу былааннамматын истэн хомойдулар. Бу үлэ 2019-2023 сс. бырыгырааманан ыытыллара этилиннэ.
Тырааныспар комплексын уонна суол хаһаайыстыбатын миниистирэ Сергей Винокуровка аҕыйаҕа суох ыйытыы бэрилиннэ. Үөһээ Бүлүү Үөдүгэйин баһылыга Валерий Васильев акцизтан, уматыктан киирэр үптэн бэриллэр харчы хайдах суоттанарын интэриэһиргээтэ. Холобур, 48 пааспардаммыт уулуссалаах Үөдүгэйгэ 900 тыһ. солк., оттон икки-үс уулуссалаах нэһилиэккэ 700 тыһ. солк. көрүллэрин эттэ. Арбын баһылыга Николай Соловьев Арктика улуустарыгар курдук, өрүс уҥуор сытар нэһилиэктэргэ катер атыылаһарга, Кэбээйиттэн Юрий Иванов үрэхтэргэ понтон муосталары тутарга көмөлөһөргө туруорустулар. Бу курдук семинар бэрт көхтөөхтүк барда, баһылыктар сүрүн министиэристибэлэр уонна биэдэмистибэлэр сирэй салайааччыларын көрсөн олорон, интэриэһиргиир ыйытыыларыгар толору хоруйу ыллылар.
Раиса Сибирякова, “Саха сирэ” хаһыат, edersaas.ru.
Хаартыскаҕа Мария Васильева (СИА) түһэриитигэр: семинар түгэнэ.