Сыл ахсын сааскы уонна сайыҥҥы кэмҥэ баһаар суоһуур кутталын аччатыыга сэрэтэр тэрээһиннэри ыытыахтаахпыт.
Баһаартан сэрэхтээх буолуу ыйыгар “Саха Өрөспүүбүлүкэтин Баһаары утары судаарыстыбаннай сулууспата” СӨ бүддьүөт тэрилтэтин уоттан сэрэтиигэ инструктордара кэтээн көрүүгэ отделениетын үлэһиттэрин уонна олохтоох салайыныы уорганнарын кытта муниципальнай тэриллиилэр нэһилиэнньэлээх пууннарыгар 251 рейдэни ыыттылар. Нэһилиэнньэ кыаммат араҥата уонна элбэх оҕолоох ыал олорор 3174 миэстэтин бэрэбиэркэлээтилэр, 61 тыһ. тахса киһиэхэ сүбэлээтилэр, 7,5 тыһ кэтэх ыал дьиэтин уонна 7,2 тыһыынча кыбартыыраны көрдүлэр-иһиттилэр.
Ыытыллыбыт үлэлэри сэргэ Саха Өрөспүүбүлүкэтин Баһаары утары судаарыстыбаннай сулууспата биирдиилээн дьоҥҥо, бары көрүҥнээх бас билии тэрилтэлэригэр уонна предприятиеларыгар туһаайан манныгы иһитиннэрэр:
Былырыыҥҥы кур от, эбийиэктэр уонна олорор дьиэлэр тиэргэннэригэр хаппыт бөх-сыыс, ыал тэлгэһэлэрин таһыгар мунньуллубут от тобоҕо куурдаҕына-хаттаҕына уот турар куттала суоһуур. Бу кэмҥэ баһаар биричиинэтинэн кур окко эбэтэр бөххө түспүт умулларыллыбатах бөппүрүөскэ сигэриэтэ эбэтэр испиискэ, ону тэҥэ умулларыллыбакка хаалбыт кутаа уота буолуон сөп.
Уот турбатын туһугар манныгы сүбэлиибит:
— Предприятиелар уонна тэрилтэлэр тиэргэннэрин, олорор дьиэлэргэ уонна тиэргэн иһинээҕи тутууларга сыста сытар учаастактары кур оттон уонна умайар туруктаах бөхтөн-сыыстан ыраастааҥ. Нэһилиэнньэлээх пууннар сирдэригэр-уоттарыгар уонна чугастарыгар уонна мас олордуллубут сирдэригэр бөҕү-сыһыы уонна кур оту уматымаҥ. Нэһилиэнньэлээх пууннар сирдэригэр-уоттарыгар ойууртан уонна куурбут-хаппыт оттоох хонуулартан уот ыстаныытын тохтотор тэрээһиннэри ыытыҥ (нэһилиэнньэлээх пууннар тастарын хорутуҥ уонна минерализованнай көмүскүүр балаһалары оҥоруҥ);
— бары эбийиэктэри, ону тэҥэ олорор уонна даача дьиэлэрин баһаары умулларар тэриллэринэн (огнетушителлэр, уулаах иһиттэр, биэдэрэ, күрдьэх) хааччыйыҥ;
— уоту умулларарга эбийиэктэри уунан хааччыйыҥ, баһаарынай уу тиһигин, гидраннары, ууну оботторор сиргэ тиийэр суолу бэрэбиэркэлээҥ. Нэһилиэнньэлээх пууннарга “КСЭОН” тыас-уус таһааран биллэрэр тэрил үлэлиир кыахтааҕын бэрэбиэркэлээҥ. Уот тэрилин, сырдатар уот тиһиктэрин эрдэттэн бэрэбиэркэлээҥ, итэҕэстэрин тутатына туоратыҥ;
— бары үлэһиттэри, нэһилиэнньэлээх пууннар олохтоохторун уот туруутун сэрэтэр миэрэлэргэ үөрэтиҥ.
“Саха Өрөспүүбүлүкэтин Баһаары утары судаарыстыбаннай сулууспата” тэрилтэ пресс-сулууспата.