Сунтаар улууһун Кэмпэндээйитигэр баар Г.Е. Чолбодуков аатынан санаторий-профилакторийга («АЛРОСА» «оҕото» диэххэ сөп. Хампаанньа иһинэн киирэр тэрилтэ) сыллата хастыы да сүүһүнэн киһи сынньанан, доруобуйаларын көннөрүнэн ааһаллар.
Санаторий алта куорпустаах, уопсайа 50-ча киһи үлэһиттээх. Онон Кэмпэндээйи үгүс олохтоохторо манна үлэлииллэр. Санаторий 38 миэстэлээх. Кыһыннары-сайыннары үлэлиир буолан, өрөспүүбүлүкэ араас муннуктарыттан сүүһүнэн киһи кэлэн ааһар. Атын регионнартан эмтэнэ кэлээччиилэр да бааллар.
Урукку өттүгэр «АЛРОСА» үлэһиттэрэ эрэ сынньанар, доруобуйаларын көннөрүнэр буоллахтарына, билигин ким баҕарар кэлиэн сөбүн санаторий дириэктэрэ Марат Вазиев этэр.
Мииринэйтэн кэлэ сылдьар Виктор Конев уонна Григорий Копылов сынньалаҥ бу көрүҥэ сыаната удамырынан, суоллааҕы ороскуота кыратынан уонна аҕыйах хонукка түбүктээх үлэни умна түһэргэ табыгастааҕын кэпсииллэр. Биир суукката 2070 солк. тэҥнэһэр. Манна биир күннээҕи хонуу, эмтэнии, аһылык киирэ сылдьар. Онтон биир күннээҕи эмтэнии уонна аһылык төлөбүрэ 1555 солк. Таһыттан сылдьан эмиэ эмтэниэххэ сөп. Ол быдан чэпчэки. 625 солк. тэҥнэһэр.
Анивера АКИМОВА.