Саҥа дьыллааҕы сынньалаҥҥа Дьокуускайга кэнсиэр арааһа буолла. Көр-күлүү түһүлгэтэ «Без быара», биирдиилээн артыыстар кэнсиэртэрэ, «Оливье-шоу», «Рождественская звезда», «Сүрүн түһүлгэ», «Үрдэл» бириэмийэ биэчэрэ о.д.а сааратар тэрээһин эгэлэгэтэ ыытылынна. Барытыгар киирии билиэтинэн лотерея онньоттулар. Биир, икки хостоох кыбартыыраттан саҕалаан убаһаҕа, уу мотуоругар тиийэ бириистээх гыммыттар. Саха дьонугар Саҥа дьылынан бэртээхэй бэлэҕи оҥордулар.
«Саха сирэ» хаhыат, edersaas.ru
Биллэр хомусчут Георгий Слепцов-Чаҕылҕан 7-с айфону сүүйэн үөрүүтэ муҥура суох.
«Ийэм бэлэхтээбит билиэтинэн «Рождественская звезда» кэнсиэркэ сырыттым. Куруук артыыс быһыытынан сыана кэтэҕэр сылдьар бэйэм бу сырыыга көрөөччүнэн тиийдим. Лотереяҕа сүүйүөм диэн өйбөр да суоҕа. Ийэм төлөпүөннээн «Хайаан да бараҕын. Ороһооспоҕо дьиктилээх, алыптаах түгэн хайаан да буолуоҕа» диэбитин быһа гыммакка тиийбитим. Барыта 35 тыһ. солк. 14 билиэти атыыласпыт этэ. 7-с айфон төлөпүөн оонньоноругар мин нүөмэрбин эппиттэригэр бастаан утаа итэҕэйииминэ дөйөн олорбутум. Онтон, дьээ, сүүрдүм. Билигин даҕаны ситэ итэҕэйбэккэ олоробун. Ийэм Попова Сардана Николаевнаҕа улахан махтал. Билигин икки айфоннанным. 35 000 солк. боруостаннаҕа ол«, — диэн Георгий facebook-ка үөрүүтүн үллэстэр.
Онуоха Георгий Слепцов биир аймаҕа 40 000 солк.суумалаах сынньалаҥ путевканы сүүйбүт. Билиэт сыаната, кырдьык, «төннүбүт».
Бу кэнсиэркэ саамай улахан бириис биир хостоох икки кыбартыыра этэ. Ильменскэй уонна Автодорожнай уулуссаларга тутуллубут быйыл үлэҕэ киириэхтээх дьиэҕэ. Кыайыылааҕынан Нам улууһуттан Ивановтар дьиэ кэргэннэрэ буолла. Надежда уонна Мирослав Ивановтар, үс оҕолоох эдэр ыал, үөрүтэ үксээтэ. Иккис кыбартыыраны Хаҥаластан Владимир Чемезов сүүйдэ.
Бааттаах сахаларга эҕэрдэ!
«Саха сирэ» хаhыат, edersaas.ru
Хаартыскаҕа: Надежда уонна Мирослав Ивановтар оҕолорунуун.