Мэҥэ Хаҥалас улууһугар Баатараҕа ааспыт нэдиэлэҕэ Өймөкөөнтөн уонна Амматтан саха сүөһүлэрин аҕалбыттара. Бу туһунан СӨ Тыа хаһаайыстыбатын министиэристибэтин пресс-сулууспата иһитиннэрэр.
«Саха сүөһүтэ» ГХТ сүрүн зоотехнига Андрей Турантаев бэлиэтээбитинэн, саха сүөһүтэ тулуурдааҕынан ураты. Айан кэнниттэн сүөһүлэр этэҥҥэлэр. Барыта 19 төбөнү, ол иһигэр 7 ыанар ынаҕы үс массыынанан Өргөннөөх учаастагар аҕалбыттар. Этэллэринэн, манна өссө сэрии иннинэ саха сүөһүтүн иитэ сылдьыбыттар. Онон хороҕор муостаахтар дойдуларыгар төннөн кэллилэр диэн олохтоохтор үөрүүлэрэ муҥура суох.
Сүөһүлэри эргэ хотоҥҥо туруораллар. Кыстыктарыгар 40 туонна оту бэлэмнээбиттэр. Бэлиэтээн эттэххэ, сэтинньи ортотугар манна итинник 40 боруоданы өссө аҕалыахтаахтар. Онуоха диэри 100 төбө турарыгар суоттаммыт саҥа каркаас хотон ситэн-хотон бэлэм буолуохтаах. Бүгүҥҥү күҥҥэ тутуу тиһиктээхтик салҕанар, инвестор «Навигатор+» ХЭУо.
Бу саха сүөһүтүн элбэтэргэ сыаллаах-соруктаах үлэлэһэр тохсус отделение диэн бэлиэтииллэр. Отделение управляющайынан Сыымах олохтооҕун Василий Жиркову анаабыттар.
Тыа хаһаайыстыбатын миниистирэ Александр Атласов бэлиэтииринэн, саха сүөһүтүн харыстыырга, элбэтэргэ тэрилтэ дьоһун хардыылары оҥорор. «Хаһаайыстыбалар көрдөрүүлэрэ куһаҕана суох. Саҥа комплекстар тутуллаллар, онон үлэни сайыннарарга үчүгэй тирэхтэр оҥоһуллаллар», — диир миниистир.
Кэнники биэс сылга саха сүөһүтүн ахсаана 1,5-2 төгүл элбээбит. Итинтэн 760 төбө генопуонда питомнигар киирэллэр, 555 – баазабай хаһаайыстыбаларга, 585 – ИП-ларга, фермердэр хаһаайыстыбаларыгар.
Бүгүҥҥү күҥҥэ саха сүөһүтүн көрүүнэн-истиинэн өрөспүүбүлүкэ 14 улууһугар 20 нэһилиэккэ уонна Дьокуускайга дьарыктаналлар. Быйылгы сыл алтынньы 1 күнүнээҕи туругунан саха сүөһүтүн ахсаана 2394 төбөҕө тиийбит, ол иһигэр ынаҕа 804, төрүөх — 550. «Саха сүөһүтэ» ГХТ бу уопсай төбөттөн 983, ол иһигэр 277 ынах баара бэлиэтэнэр. Оттон саха сүөһүтүн ахсаанын 2024 сылга диэри 3 тыһыынчаҕа тиэрдэр сорук турар.
+1
+1
+1
+1
+1
+1
+1