Бүгүн, балаҕан ыйын 9 күнэ, Арассыыйа үрдүнэн быыбар биир кэлим күнэ! 80 эрэгийиэҥҥэ араас таһымнаах быыбардар ыытыллаллар, ол иһигэр, 22 эрэгийиэн баһылыга, 16 эрэгийиэн парламенын дьокутааттара талыллаллар.
edersaas.ru
Саха Өрөспүүбүлүкэтин олохтоохторо Ил Дарханы, Ил Түмэн дьокутааттарын, киин куорат баһылыгын, Дуума дьокутааттарын, 15 улуус уонна 20 нэһилиэк баһылыктарын, 22 улуус итиэннэ 7 нэһилиэк дьокутааттарын талабыт. Маны таһынан, «Эдьигээн эбэҥки национальнай нэһилиэгэ» муниципальнай тэрээһин олохтоохторо Эдьигээн бөһүөлэгэр арыгы атыытын бобору-боппоту бүгүн референдумунан быһаараллар.
Лоп курдук 9 чаастан бары улуустарга быыбардыыр хамыыһыйалар ааннарын тэлэччи астылар. Киэҥ-нэлэмэн сирдээх Сахабыт сиригэр чаһы курдааһына тус-туһунан. Ол курдук, алта хотугу улууска (Абыйга, Аллайыахаҕа, Аллараа Халымаҕа, Орто Халымаҕа, Үөһээ Халымаҕа уонна Муомаҕа) куоластааһын Дьокуускай бириэмэтиттэн икки чааһынан, үс оройуоҥҥа (Дьааҥыга, Өймөкөөҥҥө, Усуйаанаҕа) биир чааһынан эрдэлээтэ.
Раиса Сибирякова, «Саха сирэ» edersaas.ru