Баатаҕайга уу таһыма муҥутуур кэрдиискэ чугаһаабыт

Бөлөххө киир:

Бүгүн, от ыйын 14 күнүнээҕи, туругунан Дьааҥы улууһун Суордааҕар, Токуматыгар, Боруулааҕар уу таһыма түстэ. Бу нэһилиэнньэлээх пууннарга халаан содулун туораатыы үлэлэрэ саҕаланнылар.

Бүгүн сарсыардааҥҥы дааннайынан, Бөтөҥкөскө уу таһыма 1054 см диэри тиийбит. Муҥутуур кэрдиис манна 1100 см тэҥнэһэр. Нэһилиэккэ 153 тэлгэһэ, ол иһигэр 50 олорор дьиэ, ууга баран турар. Кылгас кэмҥэ олохтоммут пууҥҥа билигин 12 киһи баар, олор истэригэр биэс оҕо, 70-тан тахса киһи аймахтарынан тарҕаһан олороллор.

Боронукка уу муҥутуур кэрдииһи лаппа аһаран, билигин 1090 см тэҥнэһэн турар. Манна 55 тэлгэһэ ууга барбыт. 270-тан тахса киһи аймахтарыгар, билэр дьонноругар тахсан олороллор.

Улуус киинигэр, Баатаҕайга, уу таһыма муҥутуур кэрдиискэ чугаһаан 919 см тэҥнэспит. Түөрт чаас устата уу 9 см тиийэ тахсыбыт. Билиҥҥитэ ууга барбыт дьиэ, тэлгэһэ суох.

Ол оннугар Верхоянскай куоракка балаһыанньа уустук. Билигин уу таһыма 1088 см, муҥутуур кэрдиис манна 1020 см этэ. Түөрт чаас иһигэр уу 4 см түспүт. Куоракка 92 дьиэ ууга барбыт. Манна барыта 150-тан тахса киһи олорор. Кинилэр бары кылгас кэмҥэ олорор пууннарга көспүттэр.

Санатан эттэххэ, бэҕэһээ Дьааҥы уонна Кэбээйи улуустарыгар эрэгийиэннээҕи ыксаллаах быһыы-майгы биллэриллибитэ. Бүгүн Ил Дархан Айсен Николаев Баатаҕайга, Верхоянскайга, Боронукка сылдьан дьону-сэргэни кытары көрсүөҕэ, халаан содулун туоратыыга миэстэтигэр мунньах ыытыаҕа. Айсен Сергеевич бэҕэһээ ыксаллаах быһыы-майгы хамыыһыйатын мунньаҕар бэлиэтээбитинэн, халаан уутугар эмсэҕэлээбит дьоҥҥо суһаллык көмө оҥоһуллуоҕа. Билигин Дьокуускайга Дьааҥыттан, Кэбээйиттэн барыта 120-тэн тахса оҕо кэлэн сайыҥҥы лааҕырдарынан түстүлэр. Бүгүн өссө 50-ча оҕо Сэбээн Күөлтэн көтөн кэлиэхтээхтэр.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0