СӨ Үүнэр көлүөнэ тус сыаллаах пуондата АЛРОСА үбүнэн кыттыытынан, Арктикаҕа өссө биир социальнай эбийиэги тутууну түмүктүүр. Бу социальнай эбийиэк — 30 сытар миэстэлээх, күҥҥэ 180 киһи сылдьар поликлиникалаах, терапия уонна оҕо доруобуйатын көрөр салаалардаах балыыһа дьиэтэ. 3 000 квадратнай миэтэрэ уопсай иэннээх икки мэндиэмэннээх таас дьиэ бу ый бүтүүтэ үлэҕэ киллэриллэрэ былааннанар.
edersaas.ru
“Ыраах сытар оройуоннарга урукку мас дьиэлэр оннуларыгар тутуллар аныгы оскуолалар уонна балыыһалар, оҕо сайыҥҥы сынньалаҥа, эмтэнии төлөбүрэ курдук хас биирдии бырайыак биһиэхэ үөрэрбитигэр төрүөт буолар. Тоҕо диэтэххэ, биһиги дьоҥҥо көмөлөһөбүт”, — диэн АЛРОСА генеральнай дириэктэрин cолбуйааччы Алексей Дьячковскай бэлиэтээтэ.
Ол курдук, СӨ Үүнэр көлүөнэ тус сыаллаах пуондата “Инникибит туһугар” (“Во имя будущего”) бырагыраама “Содействие” хос бырагырааматын чэрчитинэн, Дьааҥы оройуонун Баатаҕай бөһүөлэгэр балыыһа тутуутун ыытар. Балыыһа комплексыгар терапия уонна оҕо отделениеларын таһынан, поликлиника уонна оҕону көрөр салаа баар буолуохтара. Мэдиссиинэ эбийиэгэ ыарыыны быһаарарга, эмтииргэ уонна доруобуйаны чөлүгэр түһэрэргэ аналлаах. Балыыһа ону сэргэ, доруобуйаларыгар хааччахтаах дьон сылдьарыгар наадалаах бары тэриллэринэн хааччыллыаҕа. Эбийиэги тутууну АЛРОСА 600 мөлүйүөнтэн тахса суумалаах харчынан үбүлүүр.
СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров урут иһитиннэрбитин курдук, эбийиэккэ үлэ кэмигэр пандемияны утарсар дьаһаллар тутуһуллаллар, оттон тутуу хаамыыта хайдах баарынан иһитиннэриллэ турар.
Тутуу үлэтигэр барыта 26 киһилээх тутар-таҥар биригээдэлэр уонна 2 инженер-тиэхиньик үлэлээтилэр. Балыыһа аттыгар гараас уонна суһал мэдиссиинискэй көмө сулууспатын ыстаансыйата оҥоһулуннулар. Инженер пуунугар ууну икки таһымнаахтык ыраастыыр уонна уу сүүрэр канализациятын тэриллэрэ туруорулуннулар. Аныгы мэдиссиинискэй тэриллэр, ол иһигэр доруобуйаларыгар хааччахтаах дьон сылдьарыгар аналлаах тэриллэр, толору аҕалылыннылар.
«Биһиги үлэ түмүктэниитигэр тиийдибит, уопсай тутар үлэлэр бүттүлэр. Билигин кыра нарылыыр-киэргэтэр үлэлэр ыытыллаллар. Сылаас муостаны уонна уотунан хааччыйыы систиэмэлэрин таҥыыны, балыыһа сирин-уотун күрүөлээһини, дьиэ аннынааҕы канализация ситимнэрин, ититиини холбонууну барытын түмүктээтибит — эбийиэги үлэҕэ киллэрэргэ көҥүл ылар түһүмэххэ сылдьабыт. Балыыһа иһигэр мэдиссиинискэй тэриллэри таҥар үлэлэр бара тураллар. Аныгыскы нэдиэлэҕэ инженердэр кэлэннэр, анал үлэлэри ыытыахтара. Биһиги билигин баар миэбэллэри таҥа сылдьабыт. Таһаҕаһы аҕалыы уустугунан сибээстээн, миэбэл сороҕо Баатаҕайга кыһыҥҥы суолунан эһиилги сыл олунньу-кулун тутар ыйдарыгар кэлиэҕэ. Сэтинньи бүтүүтэ үлэни барытын бүтэрэр былааннаахпыт”, — диэн “Атлант” ХЭО генеральнай дириэктэрэ Геннадий Степанов иһитиннэрдэ.
Улуус нэһилиэнньэтин доруобуйатын көмүскэлигэр
Комплекс саҥа дьиэтигэр тэрил барыта сабыс-саҥа буолуоҕа. Миэбэлтэн саҕалаан скальпелыгар тиийэ барытын уларытыахтара. Саамай бөдөҥ тэриллэринэн элбэх хайысхалаах экраннар, кислород мунньар сир, УЗИ, ЭКГ аппараттара буолуохтара. Бу тэриллэр ыарыһахха сардаҥа тыгар буортутун кыччаталларын таһынан, ис уорганнары чопчутук уонна хаачыстыбалаахтык түһэрэллэр.
Саҥа дьиэ таһаҕас тиэйэргэ уонна дьон сылдьарыгар икки лииптээх. Онон сытар ыарыһахтары киллэрэргэ-таһаарарга уонна хаамарын ыарырҕатар дьоҥҥо кыһалҕа суох буолуоҕа. Ону сэргэ, балыыһаны тутуу чэрчитинэн дьиэ таһын көрүү-истии көрүллүбүтэ. Былаһааккаҕа сибэккилэр, мастар олордуллуохтара, ыскаамыйалар баар буолуохтара.
«Биһиги бөһүөлэкпитигэр 4 744 киһи олорор. Баатаҕай Саха сирин хотугулуу-илиҥҥи сирин киининэн буолар. Бу балыыһаҕа биһиги оройуоммут эрэ буолбакка, чугас сытар оройуоннар олохтоохторо кэлэн эмтэниэхтэрэ. Тутуу хаамыыта сөптөөх тэтиминэн ыытылларын бэлиэтиэхпин баҕарабын. Бу тутуу эрэллээх уонна бигэ туруктаах буоларыгар итэҕэли үөскэтэр. Поликлиника аһылыннаҕына, мэдиссиинэ оҥорор өҥөлөрүн хаачыстыбалара тупсарыгар эрэнэбин”, — диэн “Баатаҕай бөһүөлэк” МТ дьаһалтатын баһылыга Егор Шестаков санаатын үллэһиннэ.
тэБиир кэлим түннүккэ түмүллүөхтэрэ
Саҥа балыыһа үлэҕэ киирдэҕинэ, бөһүөлэк араас муннугар тарҕанан олорбут урукку сулууспалар бары түмүллүөхтэрэ. Манна урукку поликлиника, рентген-сулууспа, суһал көмө ыстаансыйата, килииникэ-диагностика лабораторията, оҕо терапията, хирург, невропатолог, онколог, стоматолог, лор, гинеколог, акушер быраастар уонна аныгы тэриллэр көмөлөрүнэн ыарыыны быһаарар исписэлиистэр көһөн кэлиэхтэрэ. Билиҥҥи туругунан бүтүн оройуоҥҥа биир киин балыыһа үлэлиир. Дьааҥы оройуонун доруобуйатын харыстабылын састаабыгар 11 ФАП (биэлсэр-акушер пууна), 6 учаастак бырааһа, 1 быраас амбулаторията, 1 сэллиги эмтиир балыыһа, куорат 1 балыыһата киирэллэр. Онуоха онколог, флюорограф уо. д.а. курдук анал үөрэхтээх исписэлиистэр оройуоннааҕы киин балыыһаҕа эрэ бааллар.
Саҥа дьиэ үлэҕэ киирдэҕинэ, анаалыстар бары биир комплекска ылыллар буолуохтара. Уопсайынан, барыларын биир дьиэҕэ түмүү быраастар үлэлэрин судургутутарын, түргэтэтэрин уонна хаачыстыба тупсарын таһынан, ыарыһахтар эмтэнэллэрэ нус-хас, өйдөнүмтүө уонна табыгастаах буоларыгар көмөлөһүөҕэ. Холобур, сэлликкэ уорбаланар киһи хаан анаалыһын туттарар, флюорографияҕа түһэр уонна терапевка бириэмэтигэр көрдөрө кэлэр туһугар 50 кыраадыс тымныыга бөһүөлэк устун биир дьиэттэн атын дьиэҕэ бара сатыа суоҕа. Эбэтэр акушер-гинеколог оҕолоноро чугаһаабыт дьахтар анаалыстарын хос бэрэбиэркэлииргэ эбэтэр УЗИ-тын хос оҥорторорго быһаардаҕына, оҕолонуохтаах дьахтар биир быраастан биир бырааска барарыгар сүүһүнэн миэтэрэни хаамыа суоҕа.
«Саҥа поликлиника оройуон нэһилиэнньэтин сылы быһа хааччыйар кыахтанар. Нэһилиэнньэни бастакы сүһүөх звено быраастара уонна анал исписэлиистэр: терапевтар, педиатрдар, невролог, хирург, онколог, окулист, лор, стоматолог, акушер-гинеколог, дерматовенеролог, эндоскопист, инфекционист, эндокринолог, УЗИ бырааһа, рентгенолог көрүөхтэрэ-истиэхтэрэ. Физиотерапия, функциональнай диагностика, УЗИ, оҕо кэбиниэттэрэ, стоматология, лаборатория киэҥ-куоҥ уонна толору сэбилэммит хостордоох буолуохтара”, — диэн “Дьааҥы оройуоннааҕы киин балыыһа” ГБУ кылаабынай бырааһа Владимир Докторов кэпсээтэ.
Социальнай эбийиэктэри — Саха сирин улуустарыгар
Баатаҕай — Саха сирин оробуочай бөһүөлэктэриттэн биирдэстэрэ. Дьааҥыны бырамыысылыннас өттүнэн баһылааһын устуоруйата бу бөһүөлэктэн саҕаланар. Киэҥ сирдээх-уоттаах Дьааҥыны геология өттүнэн чинчийэргэ Саха сирин хотугу сиригэр төрүт пуунунан ааттыахха сөп. Оройуон култуурунай уонна историческай киинэ Верхоянскай куоракка 2004 сыллаахха “Эрэгийиэн историческай куораттара” анал аат иҥэриллибитэ.
СӨ Үүнэр көлүөнэ тус сыаллаах пуондатыгар бэлиэтииллэринэн, 2016–2020 сылларга “Инникибит туһугар” бырагыраама “Содействие” хос бырагыраама чэрчитинэн, биэс эбийиэги тутуу ыытыллар. Баатаҕайга саҥа мэдиссиинискэй комплекс “АЛРОСА” АХ үбүн суотугар тутуллар. Сакаасчыт — “Атлант” ХЭО, бэдэрээттэһэр тэрилтэ — “ТЭЛ” ХЭО.
«Саха сирэ», edersaas. анаан Андрей ШИЛОВ суруйуутуттан тылбаас.
«АЛРОСА» АХ пресс-сулууспатын хаартыскалара