Ньукуолун күнүн, самаан сайыны үөрэ көрсө, ыам ыйын 22 күнүгэр, «Биэттэ булчуттара» Баатаҕай нэһилиэгин булчуттарын түмсүүлэрэ аҕам саастаахтарга, соҕотох ийэлэргэ, кустуур дьоно суох ыалларга кус түҥэттилэр. Бу көҕүлээһини эдэр ыччат, элбэх оҕолоох дьиэ кэргэн аҕата Александр Белолюбскай этии киллэрэн, уолаттар биир тылынан өйөөн дьоҥҥо-сэргэҕэ бэлэх оҥордулар.
Уопсайа 25 ыалга Байанай бэлэҕин — кус арааһыттан дьиэлэринэн түҥэттилэр.
Бу күн, «Алгыс» аҕа көлүөнэ түмсүүтэ үгэс буолбут сайыны көрсүү тэрээһиннэригэр уолаттарбыт истиҥ эҕэрдэлэрин эттилэр, ылбаҕай ырыаларын ыллаатылар.
Маны таһынан, булчуттарбыт кус миинин буһаран кырдьаҕастары күндүлээтилэр, долгуттулар.
Тэрээһин киэн туттар киһибит Д.А. Ефимов аатынан, бары олохтоохтор сөбүлээн мустар сирбитигэр Бэстэргэ ыытылынна.
Булчут уолаттарбытыгар барыларыгар нэһилиэк олохтоохторун уонна общественность аатыттан истиҥник махтанабыт, өрүү өттүк харалаах, илии тутуурдаах буолун диэн баҕа санаабытын тиэрдэбит».
Вероника Сивцева, Баатаҕай нэһилиэгин баһылыгын солбуйааччыта.