Бэҕэһээ, тохсунньу 22 күнүгэр Ил Дархан Айсен Николаев уонна Бырабыыталыстыба эппиэттээх үлэһиттэрэ Эбээн Бытантай улууһугар үлэлээбиттэрэ.
Айсен Николаев улуус нэһилиэнньэтин сүрүн дьарыгар — таба, сылгы, ынах иитиитигэр болҕомтотун уурбута. Ону таһынан, Р.И. Шадрин аатынан Саккырыыр орто оскуолатыгар сылдьан, улууска оскуолалар уонна оҕо уһуйааннарын кыһалҕаларын билсибитэ.
Улууска үөрэх салаатын начаалынньыга Маргарита Сизых бу туһунан маннык кэпсээтэ:
— Ил Дархан Айсен Николаев 90 сылын бэлиэтээбит Саккырыыр орто оскуолатыгар ыалдьыттаата. Ил Дархан оскуола кэлэктиибин уонна үөрэнээччилэрин кытта кэпсэттэ. Былырыын күһүн арыллыбыт «Үүнүү тирэҕэ» диэн киин үлэтин билистэ. 2009 сылтан улууспутугар саҥа оскуола тутулла илик. Онон сыл аайы туруорсар туруорсуубут, улуус киинигэр саҥа таас оскуола тутуллуута. Билигин Баатаҕай Алыытын орто оскуолата 1952 уонна 1989 сыллардаахха тутуллубут икки эргэ дьиэнэн үлэлии турар. 2018 сыллааха саҥа оскуола сыбаайата түһэн, хамсааһын таҕыста диэн үөрэ сылдьыбыппыт да, ааспыт 2019 сылга туох да үлэ ыытыллыбатаҕа. Айсен Николаев бу оскуола тутуллуутугар 2020 сылга 49 мөлүйүөн солкуобай, 2021 сылга 199,5 мөлүйүөн солкуобай көрүллэн, оскуола 2022 сылга тутуллан бүтүөҕэ диэн эрэннэрдэ.
Ньургуйаана Иванова, «Саха сирэ» хаһыат, edersaas.ru
Хаартыскалар Маргарита Сизых тус түһэриититтэн